Vasant Davkhare Case : 17 वर्षांपासून सुरू असलेल्या मानहानी प्रकरणाचा निकाल! उद्धव ठाकरे-एकनाथ शिंदेंबद्दल कोर्टाचा मोठा निर्णय….

कल्याण कोर्टाने १७ वर्षांपासून सुरू असलेल्या वसंत डावखरे मानहानी प्रकरणाचा अंतिम निकाल दिला आहे. या महत्त्वपूर्ण निर्णयात शिवसेना (उद्धव बाळासाहेब ठाकरे) पक्षप्रमुख उद्धव ठाकरे आणि महाराष्ट्राचे मुख्यमंत्री एकनाथ शिंदे यांची निर्दोष मुक्तता करण्यात आली आहे. त्यांच्यासह आनंद परसने व अन्य पाच जणांनाही या प्रकरणी दोषमुक्त करण्यात आले आहे.

हे प्रकरण २००९ सालच्या एका सीडी प्रकरणाशी संबंधित होते. या खटल्यात २० हून अधिक साक्षीदारांची साक्ष नोंदवण्यात आली होती, तसेच दोन तपास अधिकाऱ्यांचे जबाबही घेण्यात आले होते. संबंधित सीडीची प्रयोगशाळेत तपासणी करण्यात आली होती आणि कलम ३१३ अन्वये उद्धव ठाकरे व एकनाथ शिंदे यांचे जबाबही नोंदवण्यात आले होते.

विशेष म्हणजे, या प्रकरणात आरोप राजकीय स्वरूपाचे असल्याचे आणि ते खोटे असल्याचा युक्तिवाद बचाव पक्षाने केला होता. अखेरीस, कल्याण सत्र न्यायालयाचे प्रथम वर्ग न्यायाधीश संतोष आगे यांच्या दालनाने हा निकाल दिला, ज्यामध्ये सर्व आरोपींची निर्दोष मुक्तता करण्यात आली. हा निकाल महाराष्ट्राच्या राजकारणासाठी महत्त्वाचा मानला जात आहे.