CNG वाहनांपेक्षा डिझेल वाहनांना जास्त पसंती, विक्रीत टाकले मागे? जाणून घ्या
मायलेजमुळे एकेकाळी भारतात डिझेल कार जास्त खरेदी केल्या जात होत्या, पण आता हा बदल येत आहे. आता CNG वाहनांची विक्री वाढत आहे. गेल्या वर्षी CNG वाहनांनी विक्रीत डिझेल वाहनांना मागे टाकले आहे.
होंडाने अमेज आणि एलिव्हेटचे सीएनजी व्हेरिएंट, रेनॉने क्विड, काइगर आणि ट्रायबरसाठी CNG मॉडेल्स, सिट्रॉनने सी 3 CNG आणि निसानने मॅग्नाइट CNG लाँच केले. CNG कारची विक्री डिझेल कारपेक्षा जास्त झाली आहे. चला तर मग याविषयीची माहिती पुढे जाणून घेऊया.
भारतात हाय मायलेज कारची मागणी वाढत आहे. त्यामुळे 2025 मध्ये पहिल्यांदाच CNG कारची विक्री डिझेल कारपेक्षा जास्त झाली आहे. वाहनच्या आकडेवारीनुसार, आर्थिक वर्ष 2025 मध्ये 787,724 CNG कारची विक्री झाली, तर डिझेल कारची विक्री 736,508 होती. हा आकडा जवळपास सर्वच प्रमुख कार कंपन्यांना CNG सेगमेंटमध्ये कार लाँच करण्यास भाग पाडू शकतो.
आर्थिक वर्ष 2025 मध्ये CNG कारच्या विक्रीत मागील वर्षाच्या तुलनेत 35% वाढ झाली आहे, तर डिझेल कारमध्ये 5%, ईव्ही आणि हायब्रीड कारच्या विक्रीत 15% वाढ झाली आहे. पेट्रोल कारच्या विक्रीत मात्र 7 टक्क्यांची घसरण झाली आहे. हा आकडा लक्षात घेता गेल्या चार महिन्यांत अनेक कंपन्यांनी CNG मॉडेल्स लाँच केले आहेत. होंडाने अमेज आणि एलिव्हेटचे सीएनजी व्हेरिएंट, रेनॉने क्विड, काइगर आणि ट्रायबरसाठी CNG मॉडेल्स, सिट्रॉनने सी 3 CNG आणि निसानने मॅग्नाइट CNG लाँच केले.
‘या’ कंपन्यांनी लाँच केल्या CNG कार
टाटा मोटर्स लवकरच आपल्या कर्व्ह एसयूव्हीचे CNG व्हर्जन लाँच करणार आहे, तर किआ वर्षाच्या अखेरीस केरेन्सचे CNG व्हर्जन सादर करण्याच्या तयारीत आहे. कियाने पुष्टी केली की किआ केरेन्सची कामगिरी आणि मायलेजसाठी सीएनजी तंत्रज्ञानाची तपासणी करत आहे, परंतु इतर मॉडेल्समध्ये CNG पर्यायांचा विस्तार करण्याची योजना नाही. या बदलांमुळे मारुती सुझुकी, ह्युंदाई, टाटा, टोयोटा, होंडा, किया, निसान, रेनो आणि स्टेलांटिस सह बहुतेक कंपन्यांकडे CNG मॉडेल असतील. फॉक्सवॅगन समूह, जेएसडब्ल्यू एमजी आणि महिंद्रा या तीन कंपन्या CNG च्या शर्यतीतून बाहेर राहण्याची शक्यता आहे.
‘या’ दोन कंपन्यांचे सर्वाधिक विकले जाणारे CNG मॉडेल्स
मारुती सुझुकीची मोठी CNG लाइनअप आणि टाटा मोटर्सच्या ट्विन सिलिंडर तंत्रज्ञानाने अलीकडच्या वाढीत महत्त्वाची भूमिका बजावली आहे. मारुती आपल्या जवळपास सर्वच मॉडेल्समध्ये फॅक्टरी फिटेड CNG चा पर्याय देते, तर टाटाच्या इनोव्हेशनने मोठ्या टाकीऐवजी बूट फ्लोअरखाली 30 लिटरचे दोन CNG सिलिंडर ठेवून सामानाची जागा वाचवली आहे. ज्यामुळे सामान्य CNG कारची मोठी कमतरता दूर होते.
