8th Pay Commission: हाती पैसा खुळखुळणार, फिटमेंट फॅक्टरनुसार किती पगार वाढणार? गणितच समजून घ्या

8th Pay Commission विषयी केंद्रीय सरकारी कर्मचारी आणि सेवानिवृत्तीधारकांची अपेक्षा वाढली आहे. फिटमेंट फॅक्टर किती असणार हे निश्चित नाही. कर्मचारी संघटना आणि प्रतिनिधींनी फिटमेंट फॅक्टर 3.83 करण्याची आग्रही मागणी केली आहे. तर एका अंदाजानुसार हा आकडा 2, 2.38 वा 2.57 इतका असू शकतो. त्याचा विविध श्रेणीतील कर्मचाऱ्यांवर फरक दिसून येईल. त्यांच्या मूळ आणि वाढीव पगारावर त्याचा परिणाम दिसेल. 8 वा वेतन आयोग सध्या कर्मचाऱ्यांच्या सूचना, हरकती आणि मागण्यांचा विचार करत आहे.

फिटमेंट फॅक्टर म्हणजे काय?

औद्योगिक कामगारांसाठी महागाई निर्देशांक (AICPI-IW) आधारे फिटमेंट फॅक्टर ठरतो. त्या आधारे मूळ वेतनात बदल दिसतो. सध्याचे मूळ वेतन × फिटमेंट फॅक्टर = संशोधित मूळ वेतन असा हा फॉर्म्युला आहे. 7th Pay Commission मध्ये 2.57 फिटमेंट फॅक्टर लागू करण्यात आला होता. त्यावेळी मूळ वेतन 7,000 रुपयांहून वाढून 18,000 रुपये इतके करण्यात आले होते. अद्याप 8 व्या वेतन आयोगानुसार फिटमेंट फॅक्टर ठरलेला नाही. अनेक कर्मचारी संघटनांनी फिटमेंट फॅक्टर 3.83 पर्यंत वाढवण्याची मागणी केली आहे.

35,400 रुपये वेतनदाराला किती फायदा

कर्मचारी 6 व्या श्रेणीनुसार काम करत असेल आणि समजा त्याचे मूळ वेतन 35,400 रुपये इतके असेल, फिटमेंट फॅक्टर 2 इतके असेल तर त्याचे मूळ वेतन 70,800 इतके होईल. फिटमेंट फॅक्टर 2.38 नुसार मूळ वेतन 84,252 रुपये आणि 2.57 च्या अनुषंगाने हे वेतन 90,978 रुपये इतके होईल. एकूण वेतन वाढ 87,792 रुपये, 1,04,472 रुपये अथवा 1,12,813 रुपयांपर्यंत होईल. म्हणजे सध्याच्या ग्रॉस वेतनाच्या तुलनेत ही वाढ जवळपास 31%, 55% आणि 68% इतकी असेल.

श्रेणी 7 आणि श्रेणी 8 ला किती फायदा?

श्रेणी 7 आणि श्रेणी 8 मधील कर्मचाऱ्यांचे मूळ वेतन 44,900 रुपये गृहित धरले. फिटमेंट फॅक्टर 2 नुसार नवीन वेतन 89,800, 2.38 आधारे 1,06,862 आणि 2.57 आधारे 1,15,393 रुपये इतका मूळ पगार होईल. तर अंदाजे ग्रॉस वेतन 1,11,352 रुपये, 1,32,509 रुपये आणि 1,43,087 रुपये इतकी होऊ शकते. तर श्रेणी आठमधील कर्मचऱ्यांचे मूळ वेतन 47,600 गृहीत धरल्यास फिटमेंट फॅक्टर 2 वर 95,200 रुपये, 2.38 आधारे 1,13,288 आणि 2.57 आधारे 1,22,332 रुपये वेतन वाढ होऊ शकते. तर अंदाजे वाढीव वेतन क्रमशः 1,18,048 रुपये, 1,40,477 रुपये आणि 1,51,692 रुपये असू शकते.

8 व्या वेतन आयोगाच्या शिफारशी मार्च ते मे 2027 या काळात येण्याची दाट शक्यता आहे. शिफारशींना सरकारने मंजूरी दिल्यानंतर नवीन वेतन आयोग लागू होईल. तरी या सर्व प्रक्रियेला एक ते दोन वर्ष लागण्याची शक्यता आहे. सध्या फिटमेंट फॅक्टर किती असेल याविषयीची कोणताही माहिती समोर आलेली नाही. आयोग प्रतिनिधी आणि कर्मचारी संघटनांची मतं जाणून घेत आहे.