Google : गुगल गरगरलं की हो, पुन्हा ठोठावला 936 कोटींचा दंड, या कारणाने आवळले वेसण

नवी दिल्ली : आपलं सर्वाचं लाडकं सर्च इंजिन गुगलबाबाला (Google) पुन्हा एकदा नियमांचं पालन न केल्याने दणका बसला आहे. भारतीय स्पर्धा आयोगाने (Competition Commission of India) यावेळी गुगलला झटका दिला आहे. नियम धाब्यावर बसविल्याप्रकरणी गुगलला मोठा दंड (Penalty)बसविण्यात आला आहे.

CCI ने गुगलला 936.44 कोटी रुपयांचा दंड ठोठावला आहे. प्ले स्टोअर हे गुगलचे सर्वात महत्वपूर्ण तंत्रज्ञान आहे. या प्ले स्टोअरवर सर्वप्रकारचे अॅप तुम्हाला एकाच ठिकाणी मिळतात. हे एक प्रकारे अॅपचे माहेरघर आहे.

त्याचा गैरफायदा घेत, प्ले स्टोअर धोरणांचा ( Play Store policies) गुगलने स्वतःच्या फायद्यासाठी वापर केल्याचे समोर आले. तसेच प्रतिस्पर्धींना नुकसान होईल अशा पद्धतीने गुगलने धोरण राबविल्याचा आरोप गुगलवर होता.

हा आरोप सिद्ध झाल्याने भारतीय स्पर्धा आयोगाने गुगलला दणका दिला आहे. प्ले स्टोअर धोरणाचा गैरवापर केल्याने आयोगाने त्यांच्यावर हा दंड ठोठावला आहे.

गुगलचा प्ले स्टोअरवर दबदबा आहे. त्याचा त्यांनी दुरुपयोग केल्याचे सीसीआयच्या लक्ष्यात आले. यापूर्वी सीसीआयने गुगलला अनुचित व्यापार प्रथेला आळा घालण्याचे निर्देश दिले होते.

या दंडानंतर गुगलला सीसीआयने पुन्हा एकदा दुरुपयोग रोखण्याचे निर्देश दिले आहेत. त्यासाठी गुगलला एक निर्धारीत अवधीही देण्यात आला आहे. गुगलने त्यांच्या धोरणाआधारे इतर अॅपचे नुकसान होईल अशी वर्तणूक करु नये असे बजाविण्यात आले आहे.

एकाच आठवड्यात गुगलला भारतात दुसऱ्यांदा कारवाईचा सामना करावा लागत आहे. यापूर्वी अॅंड्रॉईड मोबाईल उपकरणांसंबंधी बाजारातील दबदब्याचा दुरुपयोग केल्याचा आरोप करण्यात आला आणि गुगलवर 1,337.76 कोटी रुपयांचा दंड ठोठाविण्यात आला.