EPFO मध्ये मोठ्या बदलाची नांदी…वेतन मर्यादा वाढणार,1 कोटी लोकांना फायदा होणार
EPFO Big Reform: ईपीएफओ मोठ्या बदलाचा विचार करत आहे. यामध्ये मुळ वेतन मर्यादा 15,000 रुपयांहून 25 हजार रुपये केल्या जाऊ शकते. जर असे झाले तर 1 कोटीहून अधिक कर्मचाऱ्यांचा मोठा फायदा होऊ शकतो.
Wage Ceiling Hike: केंद्रीय कर्मचारी भविष्य निर्वाह निधी संघटनेविषयी (EPFO) मोठी अपडेट समोर येत आहे. काही वृत्तानुसार, ईपीएफओ PF आणि पेन्शन योगदानसाठी वेतन मर्यादा वाढवून पात्रतेसंबंधीच्या निकषात मोठा बदल करण्याचा विचार करत आहे. म्हणजेच ईपीएफओची सध्याची वेतन मर्यादा (Wage Ceiling) 15000 रुपयांहून वाढवून 25 हजार रुपये करण्याचा प्रस्ताव आहे. पूर्वी ही मर्यादा 6,500 रुपये इतकी होती. एक कोटींहून अधिक कर्मचाऱ्यांना पेन्शन आणि पीएफच्या परीघात आणण्यासाठी हे पाऊल टाकण्यात आले आहे.
कर्मचारी भविष्य निधी (EPF) आणि कर्मचारी पेन्शन योजना (EPS) अंतर्गत हे सुनिश्चित होते. मुंबईत एका कार्यक्रमादरम्यान वित्तीय सेवा विभागाचे सचिव एम नागराजू म्हणाले की 15 हजार रुपयांपेक्षा थोडी अधिक वेतन असणाऱ्या कर्मचाऱ्यांना पेन्शनचे संरक्षण नाही. त्यांना उतारवयात मुलांवर अवलंबून राहावे लागते. त्यामुळे जुन्या पेन्शन मर्यादा अपडेट करणे गरजेचे असल्याचे ते म्हणाले होते.
सध्या काय आहे नियम?
सध्याच्या नियमानुसार केवळ 15,000 रुपयांपर्यंत बेसिक सॅलरी, मुळ वेतन असणाऱ्या कर्मचाऱ्यांनाच ईपीएफ आणि ईपीएसचा फायदा मिळतो. यापेक्षा थोडी जरी अधिक कमाई होत असले तर कंपनीवर त्यांना या सामाजिक सुरक्षा योजनांचा लाभ देण्यासाठी कोणतेही बंधन नाही. त्यामुळे शहरातील खासगी कंपन्यांमधील कर्मचाऱ्यांचा एका मोठा वर्ग कमी वेतन मिळूनही सेवानिवृत्तीचा लाभ घेऊ शकत नाही.
25,000 रुपये होऊ शकते मर्यादा
वृत्तानुसार, ईपीएफओ ही मर्यादा वाढवून 25 हजार रुपये करू शकते. पुढील वर्षाच्या सुरुवातीला केंद्रीय विश्वस्त मंडळाद्वारे याप्रकरणी विचार केल्या जाण्याची शक्यता आहे. कामगार मंत्रालयानुसार, जर मुळ वेतन वाढ मर्यादा 10 हजार रुपयांनी वाढवली तर देशातील 1 कोटींहून अधिक अतिरिक्त कर्मचाऱ्यांना ईपीएफ आणि ईपीएस या सामाजिक सुरक्षांचा लाभ मिळू शकतो. विविध कामगार संघटना गेल्या अनेक वर्षांपासून त्यासाठी झगडा देत आहेत. आता सरकार ही वेतन मर्यादा 25,000 रुपये करण्याची शक्यता आहे. त्यामुळे मोठ्या प्रमाणात विविध क्षेत्रातील कर्मचाऱ्यांना फायदा होईल. तर यामुळे ईपीएफमधील दरमहा जमा होणारे योगदान वाढेल आणि ईपीएफओ फंड सुद्धा वाढेल.
