Gold Rate : सोने-चांदीत आताच करा गुंतवणूक, नाताळात फायदाच फायदा, आजचा भाव काय?

नवी दिल्ली : सोने-चांदीत (Gold Silver Rate) आता केलेली गुंतवणूक नाताळमध्ये तुम्हाला फायदा मिळवून देऊ शकते. वायदे बाजारातील तज्ज्ञांनी (commodity Expert) याविषयीचा अंदाज वर्तविला आहे. पुढील महिन्यात वायदे बाजारात सोन्याला चकाकी येणार असल्याचा दावा करण्यात येत आहे. त्यामुळे सोन्यात गुंतवणूक (Investment In Gold) करत असाल तर तज्ज्ञांचा अंदाज नेमका काय आहे, ते जाणून घ्या..

तज्ज्ञांनी वर्तविलेल्या अंदाजानुसार, नाताळपर्यंत सोन्याचा भाव (Gold Rate) 55 हजार रुपये प्रति 10 ग्रॅम होणार आहे तर चांदीलाही लकाकी येणार आहे. चांदीचा दर (Silver Price) 70 हजार प्रति किलोग्रॅम होण्याची शक्यता आहे.

अमेरिकन मध्यवर्ती बँक, फेडरल रिझर्व्हने दिलेल्या संकेतानुसार, व्याजदरात आता मोठ्या प्रमाणात वृद्धी होण्याची शक्यता कमी आहे. डॉलर इंडेक्समध्ये घसरण सुरु आहे. परिणामी गुंतवणूकदारांनी सोने आणि चांदीकडे मोर्चा वळविला आहे.

पुढील महिन्यात फेडरल रिझर्व्हची बैठक होत आहे. त्यामध्ये व्याजदरात 75 बेसिस पॉईंट्स ऐवजी 35 ते 50 बेसिस पॉईंट्सची वृद्धी होण्याचा अंदाज आहे. महागाई आटोक्यात आणण्याचा प्रयत्न यशस्वी होत असल्याचा हा परिणाम असू शकतो.

या घडामोडींमुळे डॉलर निर्देशांक 103 अंकावर येईल. त्यानंतर तो घसरुन 100 वर येईल. त्यामुळे गुंतवणूकदारांचा सोन्या-चांदीत गुंतवणुकीकडे ओढा वाढला आहे. त्याचा परिणाम भारतीय सराफा बाजारावर होईल.

IIFL चे उपाध्यक्ष अनुज गुप्ता यांच्या अंदाजानुसार नाताळमध्ये सोने आणि चांदीचे दर आगेकूच करतील. इंडेक्सन निर्देशांकामुळे सोन्याचे भाव 55 हजार रुपये प्रति 10 ग्रॅम होणार आहे तर चांदीचा दर 70 हजार प्रति किलोग्रॅम होण्याची शक्यता आहे.

चांदीच्या भावाने 64 हजारांची पातळी ओलांडलीतर चांदीतील वृद्धी थोपविता येणार नाही. चांदी नाताळपर्यंत थेट 70 हजार रुपये प्रति किलो होऊ शकते. परिणामी गुंतवणूकदारांचा मोठा फायदा होईल. तर सोन्यात 2500—3000 रुपये प्रति 10 ग्रॅमची कमाई साधता येईल.

गुरुवारी वायदे बाजारात (MCX) सोन्याचा दरात चांगली वृद्धी दिसून आली. सकाळी 10:30 वाजता प्रति 10 ग्रॅम 229 रुपयांची तेजी दिसून आली. सोने 52,680 रुपये प्रति 10 ग्रॅमवर बंद झाले.

चांदीच्या किंमतीत सकाळी 10:30 वाजता 568 रुपये प्रति किलोग्रॅम वृद्धी दिसून आली. एक किलो चांदीसाठी वायदे बाजारात आज 62,460 रुपये हा उच्चांकी भाव मिळाला.