Green Bond : आता कमाई तर कराल, पण समाधानही मिळवाल, सरकारची ही Green Bond योजना आहे तरी काय..

नवी दिल्ली : केंद्र सरकार लवकरच ग्रीन बॉंड (Green Bond) मंजूरी देऊ शकते. केंद्रीय अर्थमंत्रालयाने (Finance Minister) सॉवरेन ग्रीन बाँड बाजारात आणण्याची तयारी केली आहे. यंदाच्या अर्थसंकल्पात केंद्र सरकारने (Central Government) ग्रीन बाँड आणण्याची घोषणा केली होती. त्यानुसार लवकरच तुम्हाला कमाईसोबतच गुंतवणुकीतून समाधानही मिळवून देणार आहे.

केंद्र सरकारच्या योजनेनुसार या आर्थिक वर्षाच्या दुसऱ्या सहामाहीत 16,000 कोटी रुपयांचे बाँड आणणार आहे. या योजनेतून कमाई तर होईलच पण कार्बन उत्सर्जन कमी करणाऱ्या योजनांवर खर्च करण्यात येणार आहे.  त्यामाध्यमातून पर्यावरणाचा, निसर्गाचा समतोल साधण्यात येईल.

केंद्रीय अर्थमंत्री निर्मला सीतारमण (Nirmala Sitharaman) यांनी ग्रीन बाँडच्या माध्यमातून निधी उभारण्याचा संकल्प सोडला होता. PTI च्या वृत्तानुसार, याविषयीचे नियोजन करण्यात आले आहे. सरकार लवकरच या योजनेला मंजूरी देणार आहे.

गुंतवणूकदारांचा पैसा, त्या सरकारी योजनांमध्ये ओतण्यात येणार आहे, ज्या योजना कमी कार्बन उत्सर्जन करतील. त्याआधारे पर्यावरण वाचविण्याची कसरत तर करण्यात येईलच, पण गुंतवणूकदारांचा फायदा ही करुन देण्यात येणार आहे.

पर्यावरणासाठी सरकारच्या सकारात्मक निर्णयाला ग्रीन बाँडच्या माध्यमातून मोठा गुंतवणूकदार अप्रत्यक्षरित्या मोठे आर्थिक बळ देतात. ग्रीन बाँडची सुरुवात युरोपमध्ये 2007 मध्ये करण्यात आली होती. त्यामाध्यमातून अपारंपारिक ऊर्जा आणि इतर पर्यावरण पूरक प्रकल्पांसाठी मोठा निधी उभा करता आला.

ग्रीन बाँडच्या माध्यमातून बायोगॅस, इलेक्ट्रिक, सौर ऊर्जा तसेच सर्व अपारंपारिक योजनांसाठी गुंतवणूक करण्यात येणार आहे. त्यामुळे या योजनांना आर्थिक पाठबळ मिळेल. तसेच पर्यावरणाचा समतोल राखण्याचा प्रयत्न करण्यात येणार आहे.