Share Market : ही कंपनी Nifty-50 मधून बाहेर, हे दावेदार मैदानात, गुंतवणूकदार होणार मालामाल

नवी दिल्ली : नॅशनल स्टॉक एक्सचेंज (NSE) मध्ये दिवाळीनंतर उलटफेर होणार आहे. निफ्टी-50 मधील कंपन्यांमध्ये गुंतवणूकदार (Investor) मोठ्या आशेने गुंतवणूक करतात आणि मालामाल होतात. परंतू बाजाराच्या नियमानुसार, आता एक कंपनी या यादीतून (List) बाहेर पडणार आहे. तर इतर तीन कंपन्या या 50 कंपन्यांच्या यादीत येण्यासाठी दावेदारी ठोकणार आहेत..

येत्या काही आठवड्यात भारतातील प्रमुख निर्देशांक निफ्टी-50 मधून हाऊसिंग डेव्हलपमेंट फायनान्स कॉर्पोरेशन लिमिटेड (HDFC Ltd)बाहेर पडणार आहे. HDFC आणि HDFC Bank यांच्यामध्ये विलिनीकरणाचा प्रस्ताव वेळेपूर्वीच पूर्ण होण्याची चिन्हं आहेत. त्यामुळे निफ्टी-50 निर्देशांकात उलटफेर होण्याची शक्यता आहे.

विविध अहवालांचा आधार घेतला असता एचडीएफसीच्या जागी लोकप्रिय ब्रँड पिडिलाईट इंडस्ट्रीजचा (Pidilite Industries) समावेश होऊ शकतो. फेव्हिकॉल सारखी उत्पादने या कंपनीची आहेत. तर अडानी ग्रुप आणि अंबुजा सिमेंट्स (Ambuja Cements) यांचा निर्देशांकात समावेश होण्याची शक्यता आहे.

निफ्टी-50 इंडेक्समध्ये HDFC चा भार 5.5 टक्के इतका होता. त्यामुळे या शेअरची 1.3 ते 1.5 अरब डॉलर एवढी रक्कम निर्देशांकातून बाहेर जाईल. एचडीएफसीचा हा स्टॉक, शेअर बाजारातून या डिसेंबर अथवा जानेवारी महिन्याच्या मध्यापर्यंत बाहेर पडण्याची शक्यता वर्तवण्यात येत आहे.

HDFC आणि HDFC Bank यांच्यामध्ये विलिनीकरणाची प्रक्रिया अंतिम टप्प्यात पोहचली आहे. या विलिनीकरणाला रिझर्व्ह बँक ऑफ इंडिया आणि इतर सर्व प्रमुख संस्थांनी मान्यता दिली आहे. तर शेअरहोल्डर्सची परवानगी मिळवण्यासाठी येत्या 25 नोव्हेंबर रोजी बैठक आयोजीत करण्यात आली आहे.

या घडामोडी घडत असताना एचडीएफसीचा शेअर आज गुरुवारी, दुपारी 1.40 टक्क्यांनी घसरुन 2,353.50 रुपयांवर व्यापार करत होता. गेल्या एका महिन्यात हा शेअर जवळपास 4.52 टक्के घसरला आहे. तर या वर्षाच्या सुरुवातीपासून यामध्ये 11 टक्क्यांची घसरण नोंदविण्यात आली आहे.