Gautam Adani FPI : शेअरची भरारी, परदेशी पाहुण्यांनी आखडला हात, अदानी समूह पुन्हा संकटात?
Gautam Adani FPI : हिंडनबर्ग अहवालामुळे अदानी समूह सावरत आहे. तरी अदानी समूहाकडून योग्य स्पष्टीकरण येत नसल्याने अनेक परदेशी गुंतवणूकदार आणि कंपन्या अंग काढत आहेत. त्यामुळे अदानी समूहाला नवीन संकटाची चाहूल लागली आहे.
नवी दिल्ली : भारतीय उद्योगपती गौतम अदानी (Gautam Adani) यांच्या मागील शुल्ककाष्ट काही कमी होताना दिसत नाही. संकटांची एक एक मालिका सुरुच आहे. गेल्या पंधरवाड्यात अदानी समूहाला (Adani Group) मोठा झटका बसला आहे. अमेरिकन संशोधन संस्था हिंडनबर्गच्या अहवालाने अदानी समूहात भूकंप आला. त्यांचे अनेक शेअर गडगडले. गौतम अदानी यांची संपत्ती झरझर कमी झाली. दोन दिवसांपासून अदानी समूहाच्या शेअरने चांगली कामगिरी बजावली. शेअर (Share) पुन्हा तेजीत आले. पण आता परदेशी गुंतवणूकदारांच्या भूमिकेमुळे अदानी समूहासमोर अडचणींचा डोंगर उभा ठाकला आहे. फ्रांसच्या एका मोठ्या कंपनीने अदानी समूहासोबतची 50 अब्ज डॉलरच्या गुंतवणुकीचा प्रस्ताव बासनात गुंडाळून ठेवला आहे.
अदानी समूहाला फ्रांसच्या टोटल एनर्जीज या कंपनीने मोठा झटका दिला आहे. अदानी समूहात या विदेशी गुंतवणूकदाराने मोठ्या गुंतवणुकीची तयारी केली होती. हायड्रोजन प्रोजेक्टसाठी अदानी समूहासोबत 50 अब्ज डॉलरचा प्रस्ताव कंपनीने राखीव ठेवला आहे.
बिझनेस स्टँडर्डने रायटर्सच्या आधारे याविषयीचे वृत्त दिल आहे. त्यानुसार हिंडनबर्ग रिपोर्टनंतर अदानी समूहाचा लेखा परिक्षण अहवाल येईपर्यंत हा करार पुढे सरकणार नाही. या आरोपींची शहानिशा झाल्याशिवाय कंपनी अदानी समूहाशी पुढील बोलणी करणार नाही.
गेल्या वर्षी 2022 मधील जून महिन्यात दोन्ही समूहांनी घोषणा केली होती. त्यानुसार, फ्रांसची टोटल एनर्जीज ही कंपनी अदानी समूहात गुंतवणूक करणार होती. अदानी न्यू इंडस्ट्रीज लिमिटेडमध्ये ही कंपनी 25 टक्के इक्विटी हिस्सेदार होणार होती. ग्रीन हायड्रोजन विकसीत करण्यासाठी कंपनी अनेक प्रकल्पात सहभागी होत आहे. 2030 पर्यंत कंपनीने 50 अब्ज डॉलरच्या गुंतवणुकीचे लक्ष्य ठेवले आहे.
टोटल एनर्जीचे सीईओ पॅट्रिक पॉयाने (Patrick Pouyanne) यांनी याप्रकरणी बाजू मांडली. त्यानुसार हिंडनबर्ग रिसर्च रिपोर्टवर अदानी समूहाकडून योग्य स्पष्टीकरण आलेले नाही. कंपनीचा लेखाजोखा समोर मांडण्यात आलेला नाही. त्यामुळे हायड्रोजन प्रकल्पावर पुढील चर्चा थांबविण्यात आली आहे. यामुळे अदानी समूहाच्या अडचणीत वाढ होताना दिसत आहे.
गेल्या वर्षी 2022 मध्ये जगात सर्वात वेगाने त्यांची संपत्ती वाढत होती. त्यांची झपाट्याने प्रगती झाली. त्यांनी श्रीमंतांच्या यादीत दुसरे स्थान पटकावून सर्वांनाच धक्का दिला. जगातील श्रीमंतांच्या भुवया वर झाल्या होत्या. पण या अहवालाने त्यांच्या साम्राज्याला सुरुंग लावला. हिंडनबर्गचा अहवाला आल्यानंतर 10 दिवसांत त्यांनी 52 अब्ज डॉलर गमावले. अदानी समूहातील एकूण सर्व कंपन्यांचे भांडवल 100 अब्ज डॉलरने घसरले होते.
