विधानसभा निवडणूक होताचा इंधन दरवाढीचा झटका; मार्चमध्ये पेट्रोल 8 रुपयांनी महागणार?

मुंबई : सध्या देशात निवडणुकीचे वातावरण आहे. उत्तर प्रदेशसह (UP Assembly Elections) पाच राज्यातील विधानसभेसाठी मतदान होत आहे. दहा मार्चला निवडणुकांचे निकाल लागणार आहेत. एकीकडे कच्च्या तेलाचे दर गगनाला भिडले आहेत. मात्र दुसरीकडे भारतात पेट्रोल, डिझेलचे दर स्थिर आहेत. तब्बल 115 दिवसांपासून भारतात पेट्रोल-डिझेलचे (Petrol Diesel Price) दर स्थिर आहेत. त्यामध्ये कोणताही बदल झालेला नाही. त्यामुळे काही प्रमाणात का होत नाही सर्वसामान्यांना दिलासा मिळाला आहे. परंतु हा दिलासा आता जास्त दिवस टिकणार नाहीये. डोमेस्टिक रेटिंग एजंसी आयसीआरने (ICRA) आपल्या रिपोर्टमध्ये म्हटले आहे की, सध्या ज्याप्रमाणात कच्च्या तेलाच्या किमती वाढल्या आहेत, त्या तुलनेत भारतात लिटर मागे आठ रुपयांनी पेट्रोल स्वस्त मिळत आहे. जेव्हा भारतामध्ये पाच राज्याच्या विधानसभेच्या निवडणुकांची घोषणा झाली होती तेव्हा कच्च्या तेलाचे दर 87 डॉलर प्रति बॅरल इतके होते. ते आता प्रति बॅरल 100 डॉलरच्या उंबरठ्यावर पोहोचले आहेत. त्यामुळे निकालानंतर पेट्रोल दरवाढीचा मोठा झटका बसण्याची शक्यता आहे.

काय आहे इक्राचा रिपोर्ट?

इक्राच्या एका रिपोर्टमध्ये असे म्हटले आहे की, सरकार आता पेट्रोल, डिझेलवरील कर आणखी कमी करू शकत नाही. कर कमी केल्यास सरकारी तिजोरीवर कोट्यावधी रुपयांचा बोजा पडेल. दुसरीकडे कच्च्या तेलाच्या किमती तर सातत्याने वाढतच आहेत. त्यामुळे दहा मार्चनंतर पेट्रोल, डिझेलच्या किमतीमध्ये वाढ होऊ शकते, असा अदाज इक्राच्या वतीने व्यक्त करण्यात आला आहे.

8 वर्षात प्रथमच कच्चे तेल 100 डॉलरवर

गेल्या काही दिवसांपासून कच्च्या तेलाच्या किमती झपाट्याने वाढल्या आहेत. अर्थात त्याला कारण देखील तसेच आहे. रशिया आणि युक्रेनमध्ये सुरू असलेल्या युद्धामुळे कच्च्या तेलाचे भाव कडाडले आहेत. कच्च्या तेलाचे दर प्रति बॅरल 98 रुपयांवर पोहोचले आहेत. यापूर्वी चार डिसेंबर 2014 रोजी कच्च्या तेलाच्या किमती 100 डॉलरच्या आसपास पोहोचल्या होत्या. त्यानंतर आता तब्बल आठ वर्षांनंतर पुन्हा एकदा कच्च्या तेलाच्या दराने शंभर डॉलरचा टप्पा गाठला आहे. कच्च्या तेलाच्या किमती बघता येणाऱ्या काळात पेट्रोल, डिझेलची दरवाढ निश्चित मानण्यात येत आहे.

संबंधित बातम्या

कच्च्या तेलाच्या दरात घसरण; जाणून घ्या आजचा पेट्रोल, डिझेलचा भाव

Russia-Ukraine war, बाजारपेठेवर अनिश्चिततेचे सावट; महागाई भडकण्याची शक्यता

रशिया – युक्रेन युद्धाबाबत अर्थमंत्र्यांची चिंता; अर्थव्यवस्थेवर नकारात्मक परिणाम होण्याची भीती