इन्स्टाग्रामवरील मैत्री महागात पडली, अल्पवयीन मुलीला भेटायला बोलावले मग…

नवी दिल्ली : सोशल मीडियावरुन होणाऱ्या फसवणुकीच्या घटनांमध्ये मोठी वाढ झाली आहे. मात्र तरीही तरुण-तरुणी या आमिषाला बळी पडत आहेत. अशीच घटन दिल्लीत उघडकीस आली आहे. इन्स्टाग्रामवर मैत्री करणे एका अल्पवयीन मुलीला चांगलेच महागात पडले आहे. इन्स्टाग्रामवरील मित्राने मुलीला गुरुग्राममधील हॉटेलवर बोलावून तिच्यावर बलात्कार केला. मग तिचे न्यूड फोटो तिच्या आईला पाठवत सोशल मीडियावर पोस्ट केल्याचे उघड झाले आहे. याप्रकरणी मुलीच्या आईने पोलीस ठाणे गाठत आरोपीविरोधात तक्रार दाखल केली. आईच्या तक्रारीनुसार पोलिसांनी आरोपीविरोधात पोस्कोसह लैंगिक छळ आणि गुन्हेगारी धमकी प्रकरणी गुन्हा दाखल केला आहे.

इन्स्टाग्रामवर झाली होती मैत्री

पीडितेच्या आईने दिलेल्या माहितीनुसार, पीडित मुलीची एक वर्षापूर्वी उत्तर प्रदेशात राहणाऱ्या व्यक्तीसोबत इन्स्टाग्रामवर मैत्री झाली. यानंतर दोघांमध्ये न्यूड व्हिडिओ कॉलही झाले.

हॉटेलमध्ये भेटायला बोलावून मुलीवर अत्याचार

यानंतर आरोपीने मुलीला दोन वेळा गुरुग्राममधील हॉटेलमध्ये बोलावले आणि तिच्यावर लैंगिक अत्याचार केला. यादरम्यान त्याने मुलीचे अश्लील फोटो आणि व्हिडिओ बनवले. हे फोटो सोशल मीडियावर व्हायरल करण्याची धमकी देत भेटण्यासाठी तिच्यावर दबाव टाकत होता.

आईला मुलीचे अश्लील फोटो पाठवले

आरोपीने मंगळवारी मुलीचे अश्लील फोटो सोशल मीडियावर पोस्ट केले. तसेच तिच्या आईलाही पाठवले. याबाबत आईने मुलीकडे चौकशी केली असता मुलीने सर्व घडला प्रकार सांगितला. यानंतर आईने पोलीस ठाण्यात धाव घेत याबाबत तक्रार दाखल केली.