एकटी असल्याची संधी साधत चिमुकलीचे अपहरण करत अत्याचार, चार दिवसातील दुसरी घटना

भिवंडी : मुलींवरील अत्याचाराच्या घटना थांबण्याचे नावच घेताना दिसत नाहीत. रविवारी एका चिमुरडीवर लैंगिक अत्याचार करुन हत्या केल्याची घटना ताजी असतानाच आज आणखी एक चिमुरडी वासनेचा बळी ठरल्याचे उघड झाले आहे. शांतीनगर पोलीस ठाण्याच्या हद्दीत नागाव परिसरात ही हृदयद्रावक घटना घडली आहे.आई वडील मजुरीच्या कामावर गेले असताना अज्ञात नराधमाने हीच संधी साधत तीन वर्षाच्या चिमुरडीचे अपहरण केले. मग तिच्यावर लैंगिक अत्याचार करुन तिची हत्या केल्याची घटना उघडकीस आली आहे. याप्रकरणी शांतीनगर पोलीस ठाण्यात गुन्हा नोंद करण्यात आला आहे.

मिळालेल्या माहितीनुसार, शहरातील नागाव भागातील एका चाळीत हे पीडित कुटुंबीय वास्तव्याला आहे. मुलीचे वडील भंगार फेरीवाल्याचे करतात. पती-पत्नी आणि तीन मुलं असे हे कुटुंब दोन महिन्यांपुर्वी वास्तव्यास आले आहेत.

गरिबीमुळे पत्नी सुद्धा मजुरी कामावर जाते. मंगळवारी नेहमीप्रमाणे महिला आपल्या कामावरुन निघून गेली. यावेळी घरात तीन वर्षीय मुलीसह 5 आणि 6 वर्षांच्या मुले घरात एकटी होती.

आई कामावरुन घरी आली तर मुलगी नव्हती

महिला दुपारी एक वाजता महिला घरी आली तेव्हा तीन वर्षीय मुलगी घरी दिसली नाही. महिलेने परिसरात तिचा खूप शोध घेतला. मात्र ती सापडली नाही. अखेर सायंकाळी आठ वाजता महिलेने शांतीनगर पोलीस ठाण्यात मुलगी हरवल्याची तक्रार दिली.

चाळीतच मुलीचा मृतदेह आढळला

पोलिसांनी अपहरणाचा गुन्हा दाखल करून मुलीचा खूप शोध घेतला, मात्र मुलीचा काहीच थांगपत्ता लागला नाही. बुधवारी सकाळी त्याच परिसरातील एक चाळीच्या पहिल्या मजल्यावरील अडगळीच्या खोलीत चिमुरडीचा मृतदेह आढळून आला.

या घटनेने परिसरात खळबळ उडाली आहे. शांतीनगर पोलिसांनी आरोपीचा शोध घेण्यासाठी संपूर्ण परिसरात झडती सत्र सुरू केले आहे. मृतदेह उत्तरीय तपासणीसाठी मुंबईतील जे जे रुग्णालयात पाठविण्यात आला आहे.

शहरातील चार दिवसात घडलेल्या दुसऱ्या घटनेने सर्वत्र संताप व्यक्त केला जात आहे. पोलिसांनी या घटनेची गांभीर्याने दाखल घेत आरोपीच्या शोधासाठी पोलीस पथक तैनात केले आहे.