खेळायला आलेल्या दोन वर्षाच्या चिमुरडीसोबत आजोबाचे दुष्कृत्य, मानवतेला काळिमा फासणारी घटना

अहमदनगर / मनोज गाडेकर (प्रतिनिधी) : घरी खेळायला आलेल्या शेजारच्या दोन वर्षाच्या चिमुकडीवर 65 वर्षाच्या आजोबाने लैंगिक अत्याचार केल्याची संतापजनक घटना अहमदनगरमधील श्रीरामपूर तालुक्यात उघडकीस आली आहे. श्रीरामपूर पोलिसांनी नराधम आजोबाला बेड्या ठोकल्या आहेत. भास्कर मोरे असे अत्याचार करणाऱ्या नराधम आजोबाचे नाव आहे. आरोपीविरोधात भादवि कलम 376 बालकांचे लैंगिक अत्याचारापासून संरक्षण, पोस्को कायदा कलम 4, 8 , 12 प्रमाणे गुन्हा दाखल करण्यात आला आहे. पोलीस उपनिरीक्षक सुरेखा देवरे यांच्याकडून पुढील तपास सुरू आहे. मनावतेला काळीमा फासणारी घटना घडल्याने तालुक्यात संतापाची लाट उसळली आहे.

नेहमीप्रमाणे शेजारी खेळायला गेली होती चिमुकली

पोलिसांनी दिलेल्या माहितीनुसार, श्रीरामपुर तालुक्यात 18 फेब्रुवारी महाशिवरात्रीच्या दिवशी दुपारी 2 वाजता दोन वर्षीय चिमुकली नेहमीप्रमाणे आपल्या शेजारी असलेल्या घरी खेळण्यासाठी गेली होती. शेजारी असल्याने ती आजोबांना ओळखत होती. त्याच ओळखीचा फायदा शेजारी राहणाऱ्या आणि त्यास आजोबा म्हणणाऱ्या नराधामाने घेत तिच्यावर अत्याचार केले.

मुलीला त्रास होऊ लागल्याने ती आईकडे रडत गेली

मुलीला त्रास होत असल्याने ती आईकडे रडत गेली. त्यानंतर मुलीसोबत काही तरी वाईट कृत्य झाल्याचं आईच्या लक्षात आले. त्यानंतर आई वडीलांनी थेट पोलीस स्टेशन गाठत नराधामाविरोधात गुन्हा दाखल केला. पिडीतेच्या आईच्या फिर्यादीवरून श्रीरामपूर शहर पोलिसांनी आरोपीविरोधात गुन्हा दाखल केला.

14 वर्षीय मुलाचा पाच वर्षीय मुलीवर अत्याचार

एका 14 वर्षीय मुलाने शेजारी राहणाऱ्या एका 5 वर्षीय अल्पवयीन मुलीवर बलात्कार केल्याची धक्कादायक घटना उरणमध्ये उघडकीस आली आहे. याप्रकरणी उरण पोलीस ठाण्यात गुन्हा दाखल करत आरोपीला मुलाला ताब्यात घेण्यात आले. पीडित मुलीने आईला घडलेला प्रकार सांगितल्यावर आईने उरण पोलीस ठाण्यात येऊन सदर मुलाविरोधात तक्रार दाखल केली.