खदाणीवर कपडे धुण्यासाठी गेली होती, बराच वेळ परतली नाही म्हणून घरचे पहायला गेले तर…*
नेहमीप्रमाणे महिला खदाणीवर कपडे धुवायला गेली होती. मात्र बराच वेळ होऊन गेला तरी ती घरी परतली नाही. यामुळे घरचे लोक तिला बघायला खदाणीवर गेले आणि तेथील दृश्य पाहून त्यांना धक्काच बसला.
इगतपुरी : नाशिक जिल्ह्यात एक हादरवून टाकणारी घटना घडली आहे. खदाणीवर कपडे धुण्यासाठी गेलेल्या विवाहित महिलेवर बलात्कार करून तिची हत्या केल्याची गंभीर घटना घडली आहे. इगतपुरी तालुक्यातील खंबाळे येथील विश्राम गृहाच्या बाजूला असलेल्या खदाणीजवळ ही घटना घडली. याप्रकरणी एका संशयिताला ताब्यात घेण्यात आले आहे. यात तीन ते चार संशयितांचा समावेश असल्याची माहिती असून, दोघे जण फरार आहेत. या घटनेने इगतपुरी तालुक्यात खळबळ माजली आहे. घटनेची माहिती मिळताच आमदार हिरामण खोसकर, काँग्रेसचे अॅड. संदीप गुळवे, माजी जि. प. सदस्य उदय जाधव, कृषी उत्पन्न बाजार समितीचे संचालक दिलीप चौधरी यांनी पोलीस ठाण्याला घेराव घातला होता.
नेहमीप्रमाणे कपडे धुवायला गेली ती परतलीच नाही
नेहमीप्रमाणे महिला खदाणीवर कपडे धुण्यासाठी गेली होती. यावेळी येथे दबा धरून बसलेल्या काही इसमांनी या महिलेला घेरले. यानंतर झटापट करून 20 फूट खड्ड्यात खाली पाडून तिच्यावर लैंगिक अत्याचार केला. त्यानंतर तिची हत्या केली. बराच वेळ झाला तरी घरी परतली नाही. यामुळे महिलेला पाहण्यासाठी घरातले खदाणीजवळ गेले असता ही घटना उघडकीस आली. कुटुंबीयांनी आरडाओरड केल्यानंतर स्थानिक नागरीक घटनास्थळी दाखल झाले. यावेळी तेथे एक इसम घटनास्थळी दिसून आला. नागरिकांनी त्याला पकडून घोटी पोलिसांच्या ताब्यात दिले.
विश्रामगृह परिसर बनला मद्यपींचा अड्डा
खंबाळे येथे सार्वजनिक बांधकाम विश्रामगृहाचा परिसर मद्यपींचा अड्डाच बनला आहे. मात्र याकडे कोणाचाच अंकुश नसल्याने हा प्रकार वाढतच चालला आहे. घटनेची माहिती मिळताच घोटी पोलीस ठाण्याचे सहाय्यक पोलीस निरीक्षक दिलीप खेडकर यांनी घटनास्थळी धाव घेऊन पंचनामा करून, सदर महिलेचा मृतदेह शवविच्छेदनासाठी नाशिकच्या जिल्हा रुग्णालयात पाठवला.
नागरिकांचा घोटी पोलीस ठाण्याला घेराव
या घटनेनंतर सायंकाळी हजारो नागरिकांच्या जमावाने घोटी पोलीस ठाण्यात घेराव घातला. संतप्त जमावाने पोलीस ठाण्यात दाखल होत संबंधित आरोपीला कठोर शिक्षा करावी अशी मागणी केली. तसेच घोटी पोलीस ठाण्याचे निरीक्षक दिलीप खेडकर यांची तातडीने बदली करण्यात यावी अशी मागणी यावेळी संतप्त जमावाने केली.
पोलीस अधिक्षक शहाजी उमाप, अप्पर पोलीस अधिक्षिका माधुरी कांगणे यांनी जमावाला शांत करण्याचा प्रयत्न केला. या घटनेतील सर्व आरोपींना जेरबंद करून त्यांच्यावर कठोर कारवाई केली जाईल, असे आश्वासन पोलीस अधिक्षक शहाजी उमाप यांनी दिले. याप्रकरणी घोटी पोलीस ठाण्यात गुन्हा दाखल करण्याची प्रक्रिया सुरु आहे. या प्रकरणाचा तपास पोलीस अधिक्षक शहाजी उमाप यांच्या मार्गदर्शनाखाली पोलीस पथक करत आहे.
