जबरदस्ती दाखवायचा ते व्हिडीओ, नंतर… महिलेनं सांगितलं सैतान नवऱ्याचं धक्कादायक सत्य, तुम्हालाही बसेल धक्का!

अनेक महिलांवर स्वत:च्या घरातच अत्याचार होत असल्याचे समोर आले आहे. गुजरातच्या अहमदाबाद येथे एका विवाहित महिलेने सासरी अमानुष छळ झाल्याचा गंभीर आरोप केला आहे. पीडितेच्या म्हणण्यानुसार, तिचा पती तिला जबरदस्तीने अश्लील व्हिडिओ दाखवत असे, मारहाण करत असे आणि अनैसर्गिक संबंध ठेवण्यासाठी दबाव टाकत असे. या प्रकरणी महिलेने पोलीस ठाण्यात पती, सासू आणि दीर यांच्याविरोधात तक्रार दाखल केली आहे. अहमदाबादमधील शाहीबाग परिसरात ही घटना घडली आहे. गर्भवती असताना लाथा मारून गर्भपात करण्यासाठी दबाव टाकल्याचाही आरोप महिलेने केला आहे. याबाबत सविस्तर माहिती जाणून घेऊयात.

लग्नानंतर लगेच छळाला सुरुवात

पीडित महिलेने आरोप केला की, सासरच्या मंडळींकडून तिचा सातत्याने शारीरिक आणि मानसिक छळ करण्यात आला. तिला जीवे मारण्याच्या धमक्याही देण्यात आल्या. या त्रासाला कंटाळून तिने अहमदाबाद महिला पोलीस ठाण्यात धाव घेत तक्रार दाखल केली. महिलेच्या तक्रारीच्या आधारे पोलिसांनी गुन्हा नोंदवून तपास सुरू केला आहे.तक्रारीतील माहितीनुसार, महिलेचे लग्न 2011 मध्ये झाले होते. लग्नानंतर अवघ्या 15 दिवसांतच सासरी तिच्याशी गैरवर्तन सुरू झाले. लग्नावेळी पतीचे यापूर्वी लग्न झाले होते आणि त्याला एक मूल असल्याची माहिती सासरच्या मंडळींनी लपवून ठेवली होती, असा आरोपही तिने केला आहे.

महिलेच्या लग्नानंतर सासू आणि दिराने हुंड्यासाठी टोमणे मारण्यास सुरुवात केली. गर्भवती असतानाही तिला पुरेशी विश्रांती न देता घरातील जड कामे करायला लावली जात होती. मुलीचा जन्म झाल्यानंतरही पतीचे वर्तन बदलले नाही. तो अनेकदा उशिरा घरी येत असे, पार्ट्यांना जात असे आणि पत्नीच्या इच्छेविरुद्ध जबरदस्तीने शारीरिक संबंध ठेवत असल्याचा आरोप करण्यात आला आहे.

गर्भपात करण्यासाठी दबाव

महिलेने पुढे सांगितले की, ती आजारी असतानाही तिला उत्तेजक औषधे देऊन संबंध ठेवण्यास भाग पाडले जात असे. नकार दिल्यास तिची बेदम मारहाण केली जात होती. काही काळानंतर ती पुन्हा गर्भवती राहिल्यावर पतीने गर्भपात करण्यासाठी दबाव टाकला आणि न मानल्यास घटस्फोट देण्याची धमकी दिली. या सततच्या छळामुळे महिला माहेरी निघून गेली. मात्र, पती तेथे जाऊन तिला जबरदस्तीने पुन्हा सासरी घेऊन आला. सासू आणि दीरही तिला सतत अपमानास्पद वागणूक देत होते. “तू आमच्या मुलाला आवडत नाहीस, समाजामुळेच तुला ठेवले आहे. तू आमचे घर उद्ध्वस्त केले आहेस, घटस्फोट घेऊन निघून जा,” असं तिला सांगण्यात आले.

पतीचे परदेशातील महिलांसोबत व्हिडिओ कॉल

महिलेने तक्रारी म्हटले की, एका रात्री तिने पतीला परदेशातील काही महिलांसोबत व्हिडिओ कॉलवर बोलताना पकडले. त्यानंतर तो त्या महिलांचे आक्षेपार्ह व्हिडिओ दाखवून त्याच प्रकारे संबंध ठेवण्यासाठी तिच्यावर दबाव टाकत असे. तिसऱ्या मुलीच्या जन्मानंतरही सासरच्या मंडळींचे वर्तन बदलले नाही. पतीच्या कथित विवाहबाह्य संबंधांबाबत तिने सासूला सांगितल्यानंतर सासूने तिच्याशी वाद घालून तिला घराबाहेर काढल्याचा आरोपही करण्यात आला आहे.