Crime News : व्यसनमुक्ती केंद्रातून पळून आलेल्या जावयाला पिकअपमध्ये घेतलं, जावयाला असा बडवला की त्याचा जागीचं…

भंडारा : गोसे धरणाच्या बॅकवॉटरमध्ये मृतदेह आढळलेल्या तरुणाच्या मृत्यूचे रहस्य उलगडले असून मित्रांच्या मदतीने मेव्हण्याने भावजीचा खून केल्याची घटना उघडकीस आली आहे. भंडारा (Bhandara) जिल्ह्याच्या अड्याळ पोलिस स्टेशन (Adyal police station) अंतर्गत पळसगाव (palasgaon) येथे ही घटना घड़ली आहे. या प्रकरणी चौघांना अटक केली असून दारूडा जावई बहिणीला त्रास देत असल्याने खून केल्याची कबुली मेव्हण्याने दिली आहे. मंगेश प्रेमलाल वाढई (34, रा. पळसगाव ता. साकोली) असे मृताचे नाव आहे.

मेव्हणा विलास केवलदास ऊके (30) रा. भोसाटाकळी, प्रमोद नामदेव साकोरे (35) रा. खोकरला, जितेंद्र मोतीराम अंबादे (35) रा. शिंगोरी, सुरेंद्र प्रभाकर आगरे (32) रा. मानेगाव अशी आरोपींची नावे आहेत. त्यांच्याविरुद्ध खुनाचा गुन्हा नोंदवून अटक करण्यात आली आहे.

27 जानेवारी रोजी मंगेशचा मृतदेह पवन तालुक्यातील गोसे धरणाच्या बॅकवॉटरमध्ये चकारा चिचाळ मार्गावरील एका पुलाखाली आढळून आला. त्यानंतर परिसरात एकच खळबळ उडाली होती. मंगेशला दारूचे व्यसन असल्याने तो पत्नीचा नेहमी छळ करीत होता. जावयाने दारू सोडवावी म्हणून मेव्हण्याने विविध प्रयत्न केले. जावई मंगेशला 19 डिसेंबरला भंडारा येथील एका व्यसनमुक्ती केंद्रात उपचारासाठी पाठविले. मात्र 22 जानेवारी रोजी मंगेश पळसगाव येथे पळून आला.

त्यानंतर मेव्हणा विलास ऊके मित्रांसोबत पळसगाव येथे 25 जानेवारीला आला. मंगेशला पुन्हा व्यसनमुक्ती केंद्रात घेऊन गेले. मंगेशला त्याचा मेव्हणा व मित्रांनी दारू सोडविण्यासाठी व्यसनमुक्ती केंद्रात घेऊन जात असल्याचे घरी सांगितले. त्यानंतर त्याला एका पिकअप वाहनातून नेण्यात आले. मात्र रस्त्यात या वाहनातच जबर मारहाण करण्यात आली. त्यात तो मृत्युमुखी पडला. पुरावा नष्ट करण्यासाठी धरणाच्या बॅकवॉटरमध्ये फेकून दिल्याचे सांगितले आहे.