मुलीच्या हृदयात होल, घरात अठराविश्व दारिद्र्य, इलाजासाठी पैसे नाही, मग जे घडले ते काळीज पिळटवटून टाकणारे !

पाटणा : बिहारमधील पाटणामध्ये एक धक्कदायक घटना उघडकीस आली आहे. जन्मदात्या बापानेच आपल्या अडीच महिन्यांच्या मुलीला मृत्यूच्या दाढेत लोटल्याची घटना घडल्या आहेत. कदमकुआन पोलीस ठाण्याच्या हद्दीतील काजीपूर येथे ही घटना घडली. मुलीच्या हृदयाला होल होता. आधीच मुलीच्या इलाजामुळे कर्जबाजारी झालेल्या बापाकडे तिच्या पुढील उपचारासाठी पैसे नव्हते. यामुळे बापाने स्वतःच्या जन्मदात्या मुलीची हत्या केली. हत्या केल्यानंतर मृतदेह डब्यात भरुन ठेवला. मुलगी दिसत नसल्याने पत्नीने कांगाव केला आणि पोलिसांना माहिती दिली. यामुळे मृतदेहाची विल्हेवाट लावायच्या आधीच बाप पकडला गेला. अभय यादव असे आरोपी पतीचे नाव आहे.

मुलीच्या इलाजासाठी पैसे नव्हते

अभय यादव अंडी विकून आपल्या कुटुंबाचा उदरनिर्वाह करत होता. अभयच्या अडीच महिन्यांच्या मुलीच्या हृदयात छिद्र होते. यामुळे त्याने तिच्यावर अनेक डॉक्टरांकडून इलाज केला होता. पण तिच्या तब्येतीत सुधारणा होत नव्हती. मुलीच्या इलाजामुळे अभयवर आधीच दीड लाखाचे कर्ज झाले होते. आधीच गरीबीने बेजार असलेल्या अभयला पुढील इलाज करणे शक्य नव्हते. आर्थिक चणचण आणि कर्ज यामुळे अभय पत्नी बाथरुममध्ये जाताच मुलीची हत्या केली आणि मृतदेह डालड्याच्या डब्यात भरुन किचनमध्ये ठेवला.

पत्नीने पोलिसात धाव घेतल्याने घटना उघड

पत्नी बाथरुममधून बाहेर आल्यानंतर तिला मुलगी दिसली नाही. म्हणून तिने शोधाशोध सुरु केली. अभयने पत्नीसोबत मुलीला शोधण्याचे नाटक केले. यानंतर पत्नीने कुटुंबीयांसोबत पोलीस ठाणे गाठत मुलगी बेपत्ता झाल्याची तक्रार दिली. पोलिसांनी मुलीचा शोध घेतला असता मुलगी घरातच डालड्याच्या डब्यात मृतावस्थेत आढळली. यानंतर पोलिसांनी संशयाच्या आधारे बापाला ताब्यात घेत चौकशी केली असता त्याने गुन्ह्याची कबुली दिली. पोलिसांनी आरोपीला अटक केली आहे.