अंबरनाथच्या ज्वेलर्स व्यापाऱ्याला लॉरेन्स बिष्णोईच्या नावाने धमकी, पैसे दिले नाही तर…
अंबरनाथमध्ये एका ज्वेलर्सला एक धमकीचा कॉल आला. या फोननंतर एकच खळबळ उडाली. ज्वेलर्स मालकाने तात्काळ पोलीस ठाण्यात धाव घेतली. पोलीस याप्रकरणी तपास करत आहेत.
अंबरनाथ / निनाद करमरकर : अंबरनाथमधील एका ज्वेलर्स व्यापाऱ्याला गँगस्टर लॉरेन्स बिष्णोईच्या नावाने चक्क 20 हजारांच्या खंडणीसाठी धमकी देण्यात आली आहे. याप्रकरणी शिवाजीनगर पोलीस ठाण्यात गुन्हा दाखल करण्यात आला असून, हा फ्रॉड कॉल असल्याची माहिती पोलिसांनी दिली आहे. धमकीचा फोन आल्यानंतर एकच खळबळ उडाली. 20 हजार रुपये न दिल्यास मुलीचे अपहरण करण्याचीही धमकी दिली. सिद्धू मुसेवाला हत्याकांडातील आरोपी असलेला लॉरेन्स बिष्णोई हा सध्या जेलमध्ये असून त्याने सलमान खानला सुद्धा जीवे मारण्याची धमकी दिली आहे. मात्र त्याच्या नावाचा वापर करून दहशत माजवण्याचा हा प्रयत्न असल्याची माहिती पोलिसांनी दिली आहे.
मुलीचे अपहरण केल्यास 20 लाख द्यावे लागतील
अंबरनाथच्या महालक्ष्मी नगर परिसरात परबतसिंग चुडावत यांचं देव भैरव ज्वेलर्स नावाचं सोन्या-चांदीचं दुकान आहे. चुडावत यांना 23 मार्च रोजी एक व्हॉट्सऍप कॉल आला. यावेळी समोरच्या व्यक्तीने आपण लॉरेन्स बिष्णोई गॅंगकडून बोलत असल्याचं सांगत 20 हजार रुपये खंडणी मागितली. तसंच 20 हजार रुपये न दिल्यास मुलीचं अपहरण करू, त्यानंतर 20 लाख रुपये द्यावे लागतील, अशी धमकी त्याने दिली. 20 हजार रुपये पाठवण्यासाठी धमकी देणाऱ्याने चक्क क्यूआर कोड पाठवला.
पोलिसांकडून आरोपीचा शोध सुरु
या प्रकाराने गोंधळात पडलेल्या परबतसिंग चुडावत यांनी शिवाजीनगर पोलीस ठाण्यात धाव घेत पोलिसांना याबाबतची माहिती दिली. पोलिसांनी क्यूआर कोडवरून समोरील व्यक्तीचा नंबर मिळवला असता तो दिल्लीचा असल्याचं निष्पन्न झालं. याबाबत सायबर गुन्हे शाखेच्या मदतीने अधिक तपास केला असता, हा फ्रॉड कॉल असल्याचं समोर आलं. यानंतर आता हा कॉल करणाऱ्याचा शोध सुरू असल्याची माहिती शिवाजीनगर पोलीस स्टेशनचे वरिष्ठ पोलीस निरीक्षक अशोक भगत यांनी दिली.
