Nanded Crime : अल्पवयीन मुलीचा नात्यातील तरुणावर जीव जडला, पण वडिलांना हे नाते मान्य नव्हते, मग संतापलेल्या पित्याने थेट…

नांदेड / 11 ऑगस्ट 2023 : प्रेमाला विरोध करुनही मुलगी प्रियकरासोबत लग्न करण्याचा हट्ट करत असल्याने संतापलेल्या पित्याने तिची हत्या केल्याची धक्कादायक घटना नांदेडमध्ये उघडकीस आली आहे. हत्या करुन आत्महत्या केल्याचा बनाव करत मुलीवर अंत्यसंस्कारही उरकले. मात्र आठ दिवसांनी पोलिसांना हत्येची कुणकुण लागली. पोलिसांनी प्रकरणाचा कसून तपास सुरु केला आणि अखेर सत्य उजेडात आले. मुक्रमाबाद पोलिसांनी आरोपी पित्याला अटक केली आहे. अण्णाराव राठोड असे आरोपी पित्याचे नाव आहे. नांदेड जिल्हयातील मुखेड तालुक्यातील मुक्रमाबाद पोलीस ठाण्याच्या हद्दीतील मनू तांडा येथे आठ दिवसापूर्वी ही धक्कादायक घटना घडली. ही घटना उघड होताच गावात एकच खळबळ माजली.

काय आहे प्रकरण?

मयत मुलगी दहावीची विद्यार्थिनी होती. तिचे नात्यातील एका तरुणावर प्रेम जडले होते. मात्र मुलीच्या वडिलांचा या प्रेमसंबंधाला विरोध होता. वडिलांचा विरोध असूनही मुलगी सदर तरुणाशी लग्न करण्याचा हट्ट करत होती. यामुळे वडिलांना संताप अनावर झाला आणि त्यांनी कोयत्याने वार करुन मुलीची हत्या केली. हत्या केल्यानंतर घाईत मुलीवर अंत्यसंस्कारही केले. तसेच मुलीने आत्महत्या केल्याचा बनाव केला.

मात्र आठ दिवसानंतर पोलिसांना या हत्याकांडाची कुणकुण लागली. पोलिसांनी प्रकरणाचा तपास सुरु केला. आरोपीने आधी पोलिसांची दिशाभूल करण्याचा प्रयत्न केला. मात्र पोलिसांनी कसून तपास करत हत्याकांडाचा उलगडा केला. यानंतर आरोपी पित्याविरोधात हत्येचा गुन्हा दाखल करत त्याला अटक केली. घटना उघड होताच पोलिसांसह सर्वच चक्रावून गेले.