Nagpur Crime : जन्मदात्यानेच पोटच्या पोराबाबतच केले धक्कादायक कृत्य, पत्नीलाही दिली धमकी
महिला तिच्या मुलासह स्कूटीवरून जात असताना तिचा पती व साथीदार व्हॅनमधून आले आणि मुलाला उचलून घेऊन गेले. त्यांनी त्या महिलेला धमकीही दिली.
नागपूर | 9 ऑगस्ट 2023 : रोजची भाडणं आणि जाचाला कंटाळून वेगळं राहणाऱ्या पत्नीला धमकी देत आपल्या पोटच्या पोराचेच पित्याने अपहरण (father kidnapped son) केल्याची धक्कादायक घटना समोर आली आहे. पोलिसांनी मंगळवारी याप्रकरणी माहिती दिली. सोमवारी सकाळी तुलसीनगर भागात ही धक्कादायक घटना (crime news) घडली.
पीडित महिला तिच्या मुलासह स्कूटीवरून जात असताना, एका कारने त्यांचा रस्ता अडवला. कारमधून त्या महिलेचा पती आणि त्याचा साथीदार खाली उतरले आणि ते दोघेही तिच्या मुलाला घेऊन फरार झाले. मुलाचे अपहरण करताना आरोपी पतीने त्याच्या पत्नीला जीवे मारण्याची धमकीही दिली. अपहरण झालेल्या मुलाची आई अक्सा इद्रीस पारेख तातडीने पोलिसांकडे गेली आणि मुलाचे अपहरण झाल्याची तक्रार नोंदवली. पोलिसांनी तत्काळ शोधमोहिम सुरू केली असून मध्य प्रदेशातील खांडवा येथे आरोपीच्या घरीही पोलिसांचे पथक पाठवले आहे.
नक्की काय झालं ?
मिळालेल्या माहितीनुसार, अब्दुल असे आरोपीचे नाव असून तो मध्य प्रदेशातील खांडवा येथील रहिवासी आहे. 2019 साली अब्दुल आणि अक्सा यांचा निकाह झाला. मात्र त्यानंतर अब्दुल व त्याच्या घरच्यांनी अक्सा हिचा छळ करण्यास सुरूवात केली. याप्रकरणी अक्साच्या तक्रारीनंतर खंडवा पोलिस स्टेशनमध्ये गुन्हाही दाखल करण्यात आला. त्यानंतर अक्सा तिच्या लहान मुलाला घएऊन नागपूर येथे माहेरी परतली. तिने अब्दुल याला घटस्फोटाची नोटीसही पाठवली.
मात्र घटस्फोटापूर्वीच अब्दुलने दुसऱ्या तरूणीशी लग्नही केले. महिन्याभरापूर्वी अब्दुलने अक्साला फोन केला होता आणि आपल्या मुलाला कसंही करून घेऊन जाईन, अशी धमकी तिला दिली. घटनेच्या दिवशी अक्सा मुलाला शाळेत सोडण्यास जात होती, तेव्हाच अब्दुलने संधी साधली आणि मुलाला हिसकावून घेतले. अक्साने विरोध दर्शवला असता, तिला जीवे मारण्याची धमकीही दिली आणि तो तेथून निघून गेला.
याप्रकरणी तक्रार दाखल करण्यात आल्यानंतर पोलीस सीसीटीव्ही फुटेज तपासत आहेत. अब्दुलचा मोबाईल बंद आहे. याप्रकरणाची माहिती खंडवा पोलिसांना देण्यात आली आहे. कायदेशीर बाबी तपासण्यात येत असल्याचे पोलीसांनी सांगितले.
