बॅंक खात्यात चार लाख असतानाही सायबर गुन्हेगाराने सहा लाख कसे लुटले ? अजब चलाखीने तुम्ही व्हाल हैराण
क्रेडीट कार्ड देण्याच्या नावाखाली बॅंक डीटेल्स मिळवून लुबाडण्याचे प्रकार दिवसेंदिवस वाढत चालले आहेत. अशा प्रकारे पुण्यातील एका महिला इंजिनिअरला 6.7 लाखाचा गंडा घातला गेला आहे.
पुणे : पुण्यातील एक मल्टी नॅशनल कंपनीत काम करणाऱ्या महिला सॉफ्टवेअर इंजिनिअर ऑनलाईन फ्रॉड करणाऱ्या सायबर क्राईम गुन्हेगारांच्या जाळ्यात अलगद सापडली. या गुन्हेगाराने तिचे क्रेडीट कार्ड सस्पेन्ड करण्याची धमकी देत तिच्या नेट बॅंकींगमध्ये शिरकाव करीत तिचे चाळीस मिनिटात सात ट्रांझक्शन करीत तिच्या खात्यातून 6.7 लाखाची रोकड सायबर भामट्यांनी पळविल्याची घटना उघडकीस आली आहे.
पुण्याच्या एका 24 वर्षीय महिला सॉफ्टवेअर इंजिनियर तरूणीला 1 मे रोजी दुपारी एक वाजता अनोळखी क्रमांकावरून फोन आला. आपण बॅंकेचा एक्झुकेटीव्ह बोलतोय असे त्याने भासविले. त्या व्यक्तीने त्या तरूणीला सांगितले की तिच्या नावाने दोन क्रेडीट कार्ड जारी झाले असून एक क्रेडीट कार्ड अजून अॅक्टीवेट झालेले नाही. तुम्हाला ते क्रेडीट कार्ड अॅक्टीव करायचे आहे की सस्पेंड करायचे आहे असे विचारले. त्यानंतर तक्रारदार महिलेने ते सस्पेंड करा असे सांगितले. ते क्रेडीट कार्ड सस्पेंड करण्याच्या नावाखाली त्याने तिच्या अकाऊंटचे सर्व डीटेल्स आणि पॅनकार्ड क्रमांक अशी सर्व माहीती काढून घेतली. त्यानंतर तिला वन टाईम पासवर्ड शेअर करायला सांगितला. त्यानंतर गुन्हेगाराने तिच्या नेट बॅंकींग अकाऊंटमध्ये शिरकाव मिळविला आणि तिचा ईमेल आयडी thedarkpartoflife नावाने बदलला असे अधिकाऱ्यांनी सांगितले.
चोवीस तासांत तक्रार करणे गरजेचे
त्यानंतर काही मिनिटांत सायबर गुन्हेगाराने तिच्या नावाने दोन लाखांचे प्री अप्रुव्ह पर्सनल लोनही मंजूर केले. त्याचा मॅसेज तक्रारदार महिलेला गेल्यावर आपण फसवले गेल्याचे तिला समजले. काही करण्याआधीचे सायबर गुन्हेगाराने तिच्या खात्यातील शिल्लक रक्कम 4.7 लाख आणि 2 लाखाचे कर्जाऊ रक्कम अशी 6.7 लाखाची रक्कम काही क्षणात काढून तो मोकळा झाला. या प्रकरणाची तक्रार तिने हिंजवडी पोलीस ठाण्यात दाखल केली आहे. इन्फर्मेशन टेक्नॉलॉजी कायदा आणि भारतीय दंड विधान संहितेच्या अनेक कलमांतर्गत या प्रकरणी पोलीसांनी गुन्हा दाखल केला आहे. अशा प्रकरणात लवकरात लवकर तक्रार दाखल केली तर गुन्हेगारावर लागलीच कारवाई करून गुन्हेगारावर कारवाई करणे आणि पैसे मिळविले सोपे जाते. अशा घटनात 24 तासांच्या गोल्डन अवरमध्ये गुन्हा दाखल करणे खूप गरजेचे असते अशी माहीती सूत्रांनी दिली.