Ahmednagar Crime : उधार पेट्रोल दिले नाही म्हणून कर्मचाऱ्यांना मारहाण, दोन जण गंभीर जखमी
नगरमध्ये गुन्हेगारी कमी होण्याचे नावच घेताना दिसता नाही. गावगुंडांच्या दहशतीमुळे नागरिकांमध्ये भीतीचे वातावरण पसरले आहे.
अहमदनगर / 2 ऑगस्ट 2023 : नगरमध्ये गावगुंडांची दहशत थांबताना दिसत नाही. उधार पैसे दिले नाही म्हणून गावगुंडांनी पेट्रोल पंपावरील कर्मचाऱ्यांना मारहाण केल्याची घटना नगर जिल्ह्यातील राहुरीमध्ये घडली आहे. या मारहाणीत दोन जण गंभीर जखमी झाले आहेत. जखमी कर्मचाऱ्यांना उपचारासाठी रुग्णालयात दाखल करण्यात आले आहे. मारहाणीची सर्व घटना सीसीटीव्ही कॅमेऱ्यात कैद झाली आहे. याप्रकरणी राहुरी पोलीस ठाण्यात 11 जणांवर गुन्हा दाखल करण्यात आला आहे. सीसीटीव्हीच्या आधारे पोलीस गुंडांचा शोध घेत आहेत.
काय घडलं नेमकं?
राहुरी फॅक्टरी येथील डॉ.तनपुरे साखर कारखान्याच्या पेट्रोल पंपावर ही घटना घडली आहे. या पेट्रोल पंपावर गावगुंडांचे टोळके आले आणि उधारीवर पेट्रोल मागितले. मात्र कर्मचाऱ्यांनी उधार पेट्रोल देण्यास नकार दिला. यामुळे संतापलेल्या टोळक्याने पेट्रोल पंप कर्मचाऱ्यांना लाकडी दांड्यासह लोखंडी गजाने बेदम मारहाण केली.
पोलिसांकडून आरोपींचा शोध सुरु
ही घटना पाहत असेलल्या येथील नागरिकांमध्ये दहशहतीचे वातावरण पसरले होते. दरम्यान या प्रकरणी 11 जणांवर पोलीस ठाण्यात गुन्हा दाखल झाला आहे. पोलिसांकडून आरोपींचा शोध सुरु आहे. राहुरी फॅक्टरी परिसरामध्ये या गुंडांच्या टोळक्याकडून सातत्याने सामान्य नागरिकांना ञास देण्याच्या घटना वाढत आहेत. या गुंडांच्या मुसक्या आवळण्याची मागणी नागरिकांकडून करण्यात येत आहे.
दुसऱ्या घटनेत कॉलेज तरुणावर हल्ला
बसमधील क्षुल्लक वादातून कॉलेजच्या विद्यार्थ्यावर हल्ला झाल्याची घटना नगर शहरात घडली आहे. या घटनेमुळे शहरात एकच खळबळ उडाली आहे. दिवसाढवळ्या घडणाऱ्या या घटनांमुळे नागरिकांसह विद्यार्थ्यांमध्ये भीतीचे वातावरण आहे.
