आई-वडिल लग्नाला तयार नव्हते, मग प्रियकराने मुलीच्या बापाला फोनवर म्हणाला ‘तुमची मुलगी…’, मग जे घडले ते…

कानपूर : प्रेमात पडणे एका अल्पवयीन मुलीला चांगलेच महागात पडले आहे. पित्याने प्रेमात पडलेल्या अल्पवयीन मुलीला संपवल्याची घटना उत्तर प्रदेशातील कानपूरमध्ये घडली आहे. मुलीच्या घरचे लग्नाला परवानगी देत नव्हते. परवानगगी मिळवण्यासाठी मुलाने फोन करुन खोटे सांगितले. पण हे खोटे बोलणेच मुलीच्या जीवावर बेतले. याप्रकरणी मुलीच्या आईच्या फिर्यादीनुसार पोलिसांनी हत्येचा गुन्हा दाखल करत आरोपीला अटक केली आहे. श्याम बहादूर असे हत्या करणाऱ्या आरोपी बापाचे नाव आहे.

काय आहे प्रकरण?

कानपूरच्या रावतपूर परिसरात राहणाऱ्या एका 16 वर्षीय मुलीचे परिसरातील सोनू नामक तरुणाशी प्रेमसंबंध सुरु होते. तरुणाला मुलीसोबत लग्न करायचे होते. मात्र मुलगी अल्पवयीन असल्याने तिच्या घरचे तयार नव्हते. यामुळे मुलीच्या घरच्यांची परवानगी मिळवण्यासाठी तरुणाने शक्कल लढवली. पण हीच शक्कल त्याच्या प्रेयसीच्या जीवावर बेतली.

तरुणाने मुलीच्या बापाला फोन करुन सांगितले की, ‘माझे तुमच्या मुलीवर प्रेम आहे, ती गरोदरसुद्धा आहे. त्यामुळे मी तिच्याशी लग्न करेन, आमचे लग्न करुन द्या’. हे ऐकताच मुलीच्या वडिलांचा संताप अनावर झाला. बापाने घरी जाऊन संतापाच्या भरात मुलीला संपवले. मुलगी बापाला विनवण्या करत होती, तरुण खोटं बोलतोय हे सांगत होती. मात्र बापाने तिचे काही ऐकले नाही.

मुलीचा आरडाओरडा ऐकून घरातील भाडेकरुंना हत्येचा सुगावा लागल्याने त्यांनी मुलीच्या आईला फोनवर माहिती दिली. आईने तात्काळ घरी धाव घेतली. पतीने तिलाही मारहाण केली. यानंतर पीडित महिलेने पोलीस ठाणे गाठत पोलिसांना याची माहिती दिली. पोलिसांनी तात्काळ घटनास्थळी धाव घेत आरोपीला अटक केली.