आधी विमा काढला, मग जे केले त्याने रक्ताच्या नात्यालाच काळिमा फासला !

दमोह : मध्य प्रदेशातील दमोह जिल्ह्यात एक धक्कादायक घटना समोर आली आहे. विम्याच्या पैशासाठी भावानेच भावाचा काटा काढल्याची घटना उघडकीस आली आहे. भावाची हत्या केल्यानंतर तांत्रिकाचे नाव पुढे करत पोलिसांची दिशाभूल करण्याचाही प्रयत्न केला. मात्र पोलिसांनी त्याची पोलखोल केलीच. पोलिसांनी आरोपींविरुद्ध अनेक कलमान्वये गुन्हा दाखल केला आहे. या घटनेनंतर संपूर्ण परिसरात खळबळ उडाली आहे. सुरेंद्र असे मयत व्यक्तीचे नाव आहे, तर विरेंद्र असे आरोपीचे नाव आहे. पोलिसांनी वीरेंद्रच्या साथीदारालाही अटक केली आहे. तसेच हत्येत वापरलेले शस्त्रही जप्त केले आहे.

दमोह जिल्ह्यातील बटियागड पोलीस ठाण्यांतर्गत दमोह छतरपूर मुख्य रस्त्यावर दोन दिवसांपूर्वी एका व्यक्तीचा मृतदेह आढळून आला होता. मृतदेहाची माहिती मिळताच बटियागड पोलिसांनी धाव घेतली आणि मृतदेह ताब्यात घेऊन पोस्टमॉर्टमसाठी पाठवला. पोलीस तपासात मृताचे नाव सुरेंद्र असल्याचे निष्पन्न झाले. यानंतर पोलिसांनी तपास सुरु केला.

पैशासाठी भावानेच खेळला खूनी खेळ

पोलिसांनी दिलेल्या माहितीनुसार, मृत सुरेंद्रचा भाऊ वीरेंद्र याने 8 महिन्यांपूर्वी त्याचा भाऊ आणि वहिनीचा विमा काढला होता. भावाला काही झाल्यास विमा कंपनीकडून साडेचार लाख रुपये मिळाले असते. या पैशाच्या लोभापोटी वीरेंद्रने भावाच्या हत्येचा कट रचला. ही हत्या करण्यासाठी त्याने मित्राची मदत घेतली. त्यानंतर वीरेंद्रने संधी साधत सुरेंद्रवर देशी कट्ट्याने गोळी झाडली. गोळी लागताच सुरेंद्र जागीच कोसळला. यानंतर मृतदेह जंगलात टाकून दोन्ही आरोपी पळून गेले.

वीरेंद्रनेच आपल्या भावाचा मृतदेह जंगलात असल्याची माहिती पोलिसांना दिली होती. एका तांत्रिकाने आपल्या भावाचा मृतदेह जंगलात कुठे पडला आहे हे सांगितल्याचे त्याने पोलीस जबाबात सांगितले. अंत्यसंस्कारानंतर पोलिसांनी वीरेंद्रची चौकशी केली. या चौकशीत आधी वीरेंद्रने पोलिसांची दिशाभूल केली. पण पोलिसांनी पोलिसी खाक्या दाखवताच त्याने गुन्ह्याची कबुली दिली.