Kalyan Crime : पगार दहा हजार, इन्कम टॅक्सने नोटीस धाडली 1 कोटी 14 लाखांची; काय आहे प्रकरण?
चंद्रकात वरक हाउस किपिंगमध्ये, सुरक्षा रक्षक म्हणून तर कधी कुरीअर बॉय म्हणून काम करतात. यातून जेमतेम मिळणाऱ्या 10 ते 15 हजार रुपये पगारावर उदर निर्वाह करतात.
कल्याण : कल्याणमध्ये फसवणुकीचा धक्कादायक प्रकार उघडकीस आला आहे. हाऊस किपींग किंवा सुरक्षा रक्षक म्हणून काम करणाऱ्या व्यक्तीला इन्कम टॅक्सने 1 कोटी 14 लाखांची नोटीस धाडली आहे. चंद्रकात वरक असे नोटीस धाडण्यात आलेल्या 56 वर्षीय व्यक्तीचे नाव आहे. चंद्रकात महिन्याला सोडाच तर वर्षाकाठी कधी लाख रूपये न पाहिलेल्या वरक यांची या नोटिशीनंतर पायाखालची वाळू सरकली आहे. याबाबत त्यांनी इन्कम टॅक्स विभागाकडे चौकशी केली. त्यावेळी विभागाकडून वरक यांच्या पॅनकार्डच्या परदेशातून ही खरेदी केल्याचा ठपका ठेवला आहे. या घटनेनंतर वरक यांनी या प्रकरणी सरकारने लक्ष घालून माझी यातून सुटका करावी आणि या प्रकरणाची चौकशी करावी अशी मागणी केली आहे.
महिन्याकाठी जेमतेम 10 ते 15 हजार रुपये कमावतात
कल्याणातील ठाणकरपाडा परिसरात जैन चाळीत 56 वर्षीय चंद्रकात वरक आपल्या बहिणीसह राहतात. चंद्रकात वरक हाउस किपिंगमध्ये, सुरक्षा रक्षक म्हणून तर कधी कुरीअर बॉय म्हणून काम करतात. यातून जेमतेम मिळणाऱ्या 10 ते 15 हजार रुपये पगारावर उदर निर्वाह करतात.
आयकर विभागाकडून 1 कोटी 14 लाखाची नोटीस
मात्र बुधवारी 1 तारखेला त्यांना आयकर विभागाकडून 1 कोटी 14 लाख रुपयांची नोटीस मिळाली. कोट्यवधीची नोटीस पाहून त्यांना धडकी भरली. त्यांनी आयकर कार्यालयात धाव घेत विचारणा केली.
वरक यांच्या पॅनकार्डवर चीनमध्ये खरेदी
यावेळी आयकर अधिकाऱ्यांनी त्यांना त्यांच्या पॅनकार्डवर आणि कागदपत्रांचा वापर करून चीनमधून काही वस्तूंची खरेदी करण्यात आल्याचे आणि त्यावरील कर भरणा केलेला नसल्याचे सांगितले. तसेच या प्रकरणी पोलीस ठाण्यात तक्रार करण्याचा सल्ला दिल्याचे वरक यांनी सांगितले.
हा सर्व प्रकार ऐकून वरक यांना धक्का बसला आहे. या प्रकरणी वरक यांनी पोलीस ठाण्यात तक्रार तर करणारच आहे, मात्र मी सर्वसामान्य आहे. मिळेल ते काम करून उदरनिर्वाह करतो. संबंधित विभागाने सरकारने माझी यातून सुटका करावी अशी मागणी केली आहे.
