Kalyan Crime : सामान आणतो सांगून युवक लॉजवरून पसार, रूममध्ये मृत महिला सापडल्याने खळबळ

सुनील जाधव, टीव्ही9 मराठी प्रतिनिधी, कल्याण | 11 डिसेंबर 2023 :  काही दिवसांपूर्वी रामबाग परिसरात राहणाऱ्या एका बिझनेसमनने पत्नी-मुलाची हत्या केल्याने कल्याणमध्ये खळबळ माजली होती. आता आणखी एक धक्कादायक घटना उघडकीस आली आहे. स्टेशन परिसरातील लॉजमध्ये एका महिलेचा मृतदेह सापडल्याने मोठी खळबळ उडाली आहे. ही महिला ज्या तरूणासोबत लॉजवर आली होती, तो फरार असल्याने त्यानेच तिची हत्या केल्याचा संशय व्यक्त होत आहेत.

दुहेरी हत्याकांडाला दहा दिवस उलटत नाही तोच लॉजमध्ये महिलेच्या हत्येने शहरातील नागरिक धास्तावले आहेत. ज्योती तोरडमल असे मृत महिलेचे नाव आहे. याप्रकरणाची माहिती मिळताच महात्मा फुले पोलिस स्टेशनमधील अधिकारी घटनास्थळी दाखल झाले आणि त्यांनी मृतदेह पोस्टमॉर्टमसाठी पाठवला. याप्रकरणी हत्येचा गुन्हा दाखल करण्यात आला असून आरोपीच्या शोधार्थ पोलिसांनी दोन टीम्स पाठवल्या आहेत.

घाटकोपरची महिला कल्याणला कशी पोहोचली ?

पोलिसांकडून मिळालेल्या माहितीनुसार, कल्याण स्टेशन परिसरातील तृप्ती लॉजमधील एका रूममध्ये एका महिलेचा मृतदेह सापडला. मृत महिला ज्योती तोरडमल ही मूळची घाटकोपर येथील रहिवासी आहे. शनिवारी दुपारच्या सुमारास ज्योती ही भूपेंद्र गिरी या इसमासोबत स्टेशन परिसरातील तृप्ती लॉजवर आली होती. मात्र रविवारी सकाळी बराच वेळ उलटूनही त्यांच्या रूमचा दरवाजा कोणीच उघडतं नव्हतं. त्यामुळे लॉजमधील कर्मचाऱ्यांनी दुसऱ्या किल्लीने दरवाजा उघडला तेव्हा त्यांना रूममध्ये ज्योतीचा मृतदेह आढळल्याने ते हादरलेच. त्यांनी या घटनेची माहिती तत्काळ महात्मा फुले पोलिस स्टेशनमधील अधिकाऱ्यांना दिली. पोलिस स्टेशनमधील अधिकाऱ्यांनी घटनास्थळी धाव घेत मृतदेह ताब्यात घेत पोस्टमॉर्टमसाठी पाठवला.

सामान आणण्याच्या बहाण्याने तो लॉजमधून बाहेर पडला, तो परतलाच नाही

पोलिसांच्या सांगण्यानुसार, ज्योती ही ज्या इसमासोबत लॉजवर आली होती, तो भूपेंद्र गिरी हा शनिवारी रात्री 8 च्या सुमारास सामान आणण्याच्या बहाण्याने लॉजमधून बाहेर पडला तो परत आलाच नाही. ज्योतीची हत्या करूनच तो पसार झाला असावा असा संशय पोलिसांनी व्यक्त केला आहे. मात्र त्याने ही हत्या नेमकी का, कशासाठी आणि कधी केली याबद्दल अद्याप काहीच माहिती मिळालेली नाही. फरार भूपेंद्रच्या शोधासाठी पोलिसांची दोन पथके रवाना झाली असून लवकरच त्याचा शोध घेण्यात येईल, असे पोलिसांनी सांगितलं. मात्र नुकत्याच घडलेल्या ेका दुहेरी हत्याकांडाला दहा दिवस उलटत नाही तोच स्टेशन परिसरातील लॉजमध्ये महिलेचा मृतदेह सापडल्याने शहरात पुन्हा खळबळ उडाली आहे.