पतीला सोडून प्रियकरासोबत लिव्ह इन मध्ये राहत होती महिला, मग असे काय घडले की प्रियकरानेच…

नवी दिल्ली : ड्रग्जवरुन झालेल्या भांडणातून लिव्ह इन पार्टनरनेच महिलेला जिवंत जाळल्याची घटना दिल्लीतील अमन विहार परिसरात घडली आहे. या घटनेत गंभीर जळालेल्या महिलेचा उपचारादरम्यान मृत्यू झाला आहे. याप्रकरणी पोलिसांनी आरोपीला अटक केली आहे. मोहित असे अटक करण्यात आलेल्या आरोपीचे नाव आहे. पीडित महिला आणि आरोपी गेल्या सहा वर्षापासून लिव्ह इन रिलेशनशीपमध्ये राहत होते. मागील दहा महिन्यांपासून दोघांमध्ये वाद सुरु होते. अखेर याच वादातून आरोपीने महिलेला संपवले. महिलेला पहिल्या पतीपासून 8 वर्षाचा मुलगा आणि प्रियकरापासून 4 वर्षाची मुलगी आहे.

पतीला सोडून प्रियकरासोबत लिव्ह इन मध्ये राहत होती महिला

पीडित महिलेचे पतीसोबत वाद होत होते. यामुळे महिला पहिल्या पतीला सोडून प्रियकरासोबत आली. दोघेही गेल्या सहा वर्षापासून लिव्ह इन रिलेशनशीपमध्ये राहत होते. दोघांना 4 वर्षाची मुलगीही आहे. मात्र गेल्या दहा महिन्यांपासून दोघांमध्ये सतत वाद सुरु होते. 10 फेब्रुवारी महिलेने आरोपी मोहितला मित्राच्या घरामध्ये ड्रग घेताना पाहिले.

ड्रगवरुन झालेल्या वादातून महिलेला पेटवले

यानंतर दोघांमध्ये ड्रगवरुन वाद सुरु झाला. वाद इतका विकोपाला गेला की, आरोपीने घरातील टर्पेन्टाईन महिलेच्या अंगावर ओतले आणि आग लावली. शेजाऱ्यांनी या घटनेची माहिती पोलिसांना दिली. घटनेची माहिती मिळताच पोलिसांनी तात्काळ घटनास्थळी धाव घेत महिलेला संजय गांधी मेमोरियल रुग्णालयात दाखल केले.

एम्स रुग्णालयात उपचारादरम्यान महिलेचा मृत्यू

महिलेची प्रकृती चिंताजनक असल्याने तिला एम्स रुग्णालयात रेफर करण्यात आले. एम्स गेले दहा दिवस महिलेवर उपचार सुरु होते, मात्र महिलेची मृत्यूशी झुंज अपयशी ठरली. सोमवारी रात्री महिलेचा उपचारादरम्यान मृत्यू झाला. याप्रकरणी पोलिसांनी कलम 302 नुसार आरोपीविरोधात गुन्हा दाखल करत आरोपीला अटक केली आहे.