Mumbai Crime : अल्पवयीन मुलीवर अत्याचार करत ब्लेडने वार, गुन्हे शाखेकडून आरोपीला बेड्या

मुंबई : लोअर परळ स्टेशन परिसरात एका 14 वर्षीय मुलीवर ब्लेडचे वार (Blade Attack) करून बलात्कार (Rape) करणाऱ्या नराधमाला मुंबई रेल्वे क्राईम ब्रांच पोलिसांनी चर्चगेट रेल्वे स्टेशन परिसरातून बेड्या ठोकल्या आहेत. हरीश कुमार गुप्ता असे अटक (Arrest) करण्यात आलेल्या आरोपीचे नाव आहे. आरोपी पोलिसांच्या रेकॉर्डवरील गुन्हेगार असून, त्याच्यावर याआधी चोरी, मारामारी असे अनेक गुन्हे दाखल आहेत. आरोपीने अशी किती कृत्य अजून केली आहेत याबाबत पोलीस तपास करत आहेत. पीडित मुलीवर 10 जुलै रोजी बलात्कार झाला होता. मुलीने याबाबत कुटुंबीयांना माहिती दिल्यानंतर त्यांनी शहर पोलिसात गुन्हा दाखल केला होता. पोलिसांनी कसून शोध घेत 15 दिवसात आरोपीच्या मुसक्या आवळल्या.

आरोपीला 15 दिवसात पोलिसांनी केले अटक

घरामध्ये काही कारणावरुन वाद झाल्याने पीडित मुलगी घर सोडून लोअर परळ स्टेशन परिसरात आली होती. यावेळी मुलीला एकटी बघून या नराधमाने आधी तिच्याशी ओळख केली. मग स्टेशन परिसरातील जंगलात नेऊन तिच्यावर बलात्कार करत ब्लेडने वार केले. नराधमाच्या तावडीतून सुटका करत मुलगी घरी आली आणि घडला प्रकार घरच्यांना सांगितला. त्यानंतर कुटुंबीयांनी शहर पोलिसांकडे धाव घेत तक्रार दाखल केली. पीडितेच्या तक्रारीनुसार पोलिसांनी गुन्हा दाखल केला. मात्र घटना रेल्वे हद्दीत घडल्याने गुन्हा मुंबई सेंट्रल रेल्वे पोलिसांकडे वर्ग करण्यात आला. पोलीस आयुक्त कैसर खालीद यांच्या मार्गदर्शनाखाली मुंबई रेल्वे गुन्हे शाखेने विविध टीम बनवून आरोपीचा शोध सुरु केला. तपासादरम्यान आरोपी हरिश कुमार गुप्ता चर्चगेट परिसरात गुप्त माहिती मिळाली होती. त्यानुसार पोलिसांनी चर्चगेट परिसरातून आरोपीला अटक केले. आरोपीने पोलीस चौकशीत गुन्ह्याची कबुली दिली आहे. (Accused who assaulted a minor girl with a blade was arrested by the crime branch)