ठाकरे गटाला पुन्हा धक्का, माजी नगरसेवकाच्या घरी एसीबीचा छापा, अडचणी वाढणार?

मुंबई : शिवसेना उद्धव बाळासाहेब ठाकरे (Shiv Sena Uddhav Balasaheb Thackeray) पक्षाच्या नेते आणि पदाधिकाऱ्यांच्या पाठीमागे तपास यंत्रणांचा असणारा चौकशीचा ससेमिरा काही कमी होताना दिसत नाही. शिवसेना पक्षात फूट पडल्यापासून सातत्याने ठाकरे गटाशी संबंधित अनपेक्षित अशा बातम्या समोर येत आहेत. विशेष म्हणजे ठाकरे गटाचे खासदार संजय राऊते मध्यंतरी तब्बल 100 दिवस पेक्षा जास्त काळ जेलमध्ये होते. याशिवाय ठाकरे गटाचे नेते अनिल परब यांच्या पाठिमागे देखील चौकशीचा ससेमिरा लागली आहे. त्यानंतर आता ठाकरे गटाचे नेते योगेश भोईर यांच्या अडचणी वाढवणारी बातमी समोर आली आहे.

ठाकरे गटाचे योगेश भोईर यांच्याविरोधात एसीबीने गुन्हा दाखल केलाय. एसीबीची टीम भोईर यांच्या घरी छापेमारीसाठी पोहोचल्याची माहिती सूत्रांकडून मिळाली आहे. योगेश भोईर हे माजी नगरसेवक आहेत. भोईर यांनी 85 लाख रुपयांपेक्षा जास्तची मालमत्ता जमवल्याचा त्यांच्यावर ठपका ठेवण्यात आलाय. याप्रकरणी सध्या भोईर यांच्या घरी छापा सुरु आहे.

योगेश भोईर यांच्यावर ज्ञात मिळकतीच्या 441 टक्के अपसंपदा जमवल्याचा आरोप आहे. नगरसेवक पदाच्या कालावधीमध्ये ज्ञात उत्पन्नापेक्षा अधिक 85, 56, 562 म्हणजेच 449.13 टक्के अपसंपदा संपादित केल्याचा आरोप आहे.

योगेश भोईर यांच्यावर याआधी खंडणीचे आरोप

दरम्यान, काही दिवसांपूर्वी योगेश भोईर यांना पोलिसांनी अटक केल्याची देखील बातमी समोर आली होती. योगेश भोईर हे ठाकरे गटाचे मालाड, कांदिवली पूर्व येथील माजी नगरसेवक आहेत. तसेच ते मागाठाणेचे उपविभाग प्रममुख आहेत. त्यांनी तीन महिन्यांपूर्वी पोलिसांच्या गुन्हे शाखा युनिट 11 च्या पथकाने खंडणीच्या आरोपांखाली अटक केली होती.

योगेश भोईर यांनी एस. डी. कॉर्प कंपनीकडून 25 लाख रुपयांची खंडणी मांगितल्याचा आरोप करण्यात आला होता. या प्रकरणी त्यांना अटक करण्यात आलेली. या प्रकरणी त्यांच्याविरोधात 2 डिसेंबरला गुन्हा दाखल झालेला. या प्रकरणी त्यांना अटक करण्यात आलेली. पण त्यानंतर काही दिवसांनी त्यांची जेलमधून सुटका झालेली.