Nashik Theft : इगतपुरीत ज्वेलर्सच्या दुकानात चोरी, अडीच लाखांचा ऐवज लंपास

इगतपुरी : घोटी शहरातील श्रीरामवाडी भागातील दाट लोकवस्तीच्या भागात अंबिका ज्वेलर्स ह्या दुकानात चोरी (Theft) झाल्याची घटना आज सकाळी उघडकीस आली आहे. पहाटेच्या सुमाराला ही घटना घडली असून चोरट्यांनी सीसीटीव्ही (CCTV) यंत्रणा बंद केल्याचे दिसून आले आहे. यामध्ये किमान 2 लाख 50 हजारांच्या पुढे चोरी झाल्याची शक्यता वर्तवण्यात आली आहे. याप्रकरणी घोटी पोलीस (Ghati Police) ठाण्यात चोरीची तक्रार दाखल करण्यात आली आहे. घटनेची माहिती मिळताच घोटी पोलीस ठाण्याचे अधिकारी आणि कर्मचारी घटनास्थळी दाखल झाले. उपविभागीय पोलीस अधिकारी अर्जुन भोसले यांनी उपस्थित होऊन पोलिसांना तपासकार्याबाबत मार्गदर्शन केले. या घटनेमुळे नागरिकांमध्ये चिंतेचे वातावरण पसरले आहे. भरवस्तीत झालेल्या चोरीमुळे नागरिकांमध्ये उलटसुलट चर्चेला उधाण आले आहे.

ओळख पटू नये म्हणून सीसीटीव्ही यंत्रणा निकामी केली

पोलिसांकडून तपासाची चक्रे सुरु झाली असून लवकरच आरोपींना अटक करण्यात येईल, असे सांगण्यात आले. चोरीबाबत गुन्हा दाखल करण्याची प्रक्रिया सुरु आहे. श्रीरामवाडी येथे योगेश प्रकाश उदावंत यांचे अंबिका ज्वेलर्स नावाचे दुकान आहे. आज पहाटे या दुकानात चोरी झाली. ओळख पटू नये यासाठी अज्ञात चोरट्यांनी दुकानातील सीसीटीव्ही यंत्रणा निकामी केली. या घटनेत किमान अडीच लाखांचा ऐवज चोरी झाल्याची शक्यता आहे. घोटीचे पोलीस निरीक्षक दिलीप खेडकर यांच्या मार्गदर्शनाखाली पोलीसांनी कसून तपास सुरु केला आहे. पोलीस परिसरातील सीसीटीव्ही फुटेज तपासत आहेत. आजूबाजूच्या सीसीटीव्हीद्वारे पोलीस संशयित चोरट्यांची ओळख पटवण्याचा प्रयत्न करत आहेत. (Theft in a jewelers shop in Igatpuri, two and a half lakhs gold was stolen)