पालकांविरोधात जाऊन दिली प्रियकराची साथ, आईबापाने पोटच्या गोळ्यालाच… धक्कादायक घटनेने सर्वच हादरले

मुझफ्फरनगर | 28 ऑगस्ट 2023 : किडनॅपिंग आणि अत्याचाराच्या खोट्या केसमध्ये प्रियकराविरोधात साक्ष देण्यासाठी नकार दिल्याने आई-वडिलांनी त्यांच्याच मुलीचं आयुष्य संपवल्याची (crime news) धक्कादायक घटना घडली आहे. उत्तर प्रदेशच्या मुझफ्फरनगरमध्ये ही खळबळजनक घटना घडली आहे. धक्कादायक गोष्ट म्हणजे, त्यांची ही लेक आठ महिन्यांची गर्भवती (pregnant daughter) होती. मात्र पालकांनी कोणतीही दया-माया न दाखवता मुलीचा जीव घेतल्याचे पोलिसांनी सांगितले. हत्येनंतर त्यांनी मुलीचा मृतदेह नदीत फेकून दिला. शाहपूर पोलिस स्टेशनअंतर्गत येणाऱ्या गोयला गावात ही हृदय पिळवटून टाकणारी घटना घडली आहे.

मृत मुलीने तिच्या आई-वडिलांचे ऐकले नाही. तिचा पार्टनर राहूल याच्या विरोधात पालकांनी अपहरण आणि बलात्काराची तक्रार दाखल केली होती. व मुलीने त्याच्याविरोधात साक्ष द्यावी, असे त्यांचे म्हणणे होते. मात्र त्यांच्या मुलीने प्रियकराच्या विरोधात साक्ष देण्यास नकार देत आई-वडिलांचे म्हणणे ऐकले नाही. यामुळे संतापलेल्या पालकांनी आपल्या आठ महिन्यांच्या गर्भवती मुलीचा गळा आवळून तिची हत्या केली व त्यानंतर तिचा मृतदेह नदीत फेकून दिला. याप्रकरणी मृत महिलेच्या पालकांना अटक केली असून त्यांनी आपला गुन्हा कबूल केला आहे, असे पोलिसांनी सांगितले.

नक्की काय झालं ?

पीडित मुलगी ही गेल्या वर्षी, आक्टोबर 2022 मध्ये, राहूल या तिच्या प्रियकरासोबत पळून गेली होती. मात्र पालकांच्या तक्रानीनंतर डिसेंबर महिन्यात पोलिसांनी त्यांचा शोध घेतला आणि राहूल याला तुरूंगात टाकले. त्याच्याविरोधात अपहरण आणि बलात्काराचा आरोप लावण्यात आला होता. याप्रकरणी कोर्टात खटला सुरू होता. शनिवारी पीडित मुलीला तिच्या प्रियकराविरोधात न्यायालयात साक्ष द्यायची होती. मात्र तिने पालकांना विरोध करत, प्रियकराविरोधात काहीही बोलण्यास नकार दिला. यामुळे ते संतापले आणि त्यांनी तिचा जीवच घेतला.