pune cylinder blast | पुणे गॅस सिलेंडर स्फोट, पोलीस यामुळे वेगाने लागले कामाला

रणजित जाधव, पुणे | 10 ऑक्टोंबर 2023 : पिंपरी- चिंचवडमध्ये अवैद्यरित्या गॅस रिफलिंग करताना रविवारी मध्यरात्री भीषण स्फोट झाला होता. एकामागे एक नऊ ते दहा सिलेंडरच्या स्फोटामुळे पिंपरी-चिंचवड हादरले होते. राज्याचे आरोग्य मंत्री तानाजी सावंत यांचे जेएसपीएम महाविद्यालय असलेल्या परिसरात हा स्फोट झाला होता. यामुळे आरोग्य मंत्री तानाजी सावंत चांगलेच संतापले होते. त्यांनी सोमवारी घटनास्थळी भेट देत पोलीस अधिकाऱ्यांना सुनावले. तसेच जबाबदारी निश्चित करुन २४ तासांत दोषी कर्मचाऱ्यांवर कारवाई करण्याचे आदेश दिले होते. त्यानंतर आता २४ तासांच्या आताच पोलिसांनी कारवाई केली आहे.

काय केली पोलिसांनी कारवाई

टँकरमधून अवैध गॅस भरताना रविवारी नऊ ते दहा सिलेंडरचा स्फोट झाला होता. या घटनेनंतर राज्याचे आरोग्य मंत्री तानाजी सावंत यांनी पोलिसांची जाहीर खरडपट्टी काढली होती. त्यानंतर पिंपरी चिंचवड पोलिस आयुक्तालय अ‍ॅक्शनक्शन मोडमध्ये आले आहे. घटनेच्या २४ तासांच्या आता या प्रकरणात चार पोलिसांना आणि दोन अधिकाऱ्यांना निलंबित करण्यात आले आहे. त्यामध्ये सहायक पोलिस निरीक्षक परवेझ शिकलकर, सहायक निरीक्षक बालाजी ठाकूर यांचा समावेश आहे. तसेच चार पोलीस कर्मचाऱ्यांचा समावेश आहे.

पोलिसांच्या शैलीवर प्रश्न

पुणे-बंगलोर महामार्गावर रविवारी रात्री अवैधरित्या टँकरमधून गॅस भरला जात होता. त्यावेळी सिलेंडरचे स्फोट होवून अग्नितांडव झाले होते. आधीच पुणे पोलीस ससून रुग्णालयातून आरोपी पळून गेल्यामुळे अडचणी आले आहेत. त्या प्रकरणात पोलिसांवर टीका होत आहे. आता पिंपरी चिंचवडमध्ये गॅस माफिया तयार झाले असल्याचे स्वत: राज्यातील मंत्री तानाजी सावंत यांनी सांगितले. त्यानंतर पोलिसांच्या कार्य शैलीवर प्रश्न उपस्थित केला जात होता.

गॅसची चोरी हे पोलिसांचे अपयश

पोलिसांनी या प्रकरणी चार जणांना अटक केली आहे. टँकर पार्क करण्यासाठी जागा देणाऱ्या मालकाला अटक केली आहे. तसेच चोरीच्या गॅसची विक्री करणारा व्यक्तीला पोलिसांनी पकडले आहे. अवैधरित्या सिलेंडरची वाहतूक करणारा टेम्पो चालकही पोलिसांना मिळाला आहे. दुसरीकडे दोषी पोलीस कर्मचारी आणि अधिकाऱ्यांचे निलंबन करण्यात आले आहे. पिंपरी- चिंचवडमध्ये गॅस चोरीच्या या प्रकारामुळे पोलिसांचे अपयश अधोरेखित झाले आहे.