pune crime | आमदाराच्या फेसबुक अकाउंटचे क्लोन, पुढे सायबर गुन्हेगारांनी काय केले

पुणे | 10 ऑक्टोंबर 2023 : राज्यात ऑनलाइन फसवणुकीच्या घटना वाढत आहेत. गेल्या काही वर्षांत राज्यातील सायबर पोलिसांकडे फसवणूक केल्याच्या तक्रारी वाढल्या आहेत. ही फसवणूक सर्वसामान्य व्यक्तीची होते असेच नाही तर उच्च शिक्षित लोकही त्यात अडकलेले आहेत. या सायबर भामट्यांनी विविध माध्यमातून फसवणूक करण्याचे काम सुरु केले आहे. कधी ओटीपी घेऊन तर कधी मोबाईल हॅक करुन फसवणूक केली जाते. या भामट्यांच्या रडारवर राज्यातील आयएएस आणि आयपीएस अधिकारी आले होते. आता लोकप्रतिनिधीही आले आहेत. त्यासाठी आमदाराचे क्लोन अकाऊंट तयार करण्यात आले आहे.

कोणाचे केले बनावट खाते

पुणे येथील खडकवासला मतदार संघाचे आमदार भीमराव तापकीर यांचे फेसबुक अकाउंट क्लोन करण्याची करामत सायबर भामट्यांनी केली. सायबर भामट्यांनी आमदार भीमराव तापकीर यांचे बनावट अकाउंट तयार केले. त्यानंतर अनेकांना फ्रेंड रिक्वेस्ट पाठवणे सुरु केले. त्यामाध्यमातून अनेकांकडे पैश्यांची मागणी केली जात होती. लोकप्रतिनिधींकडून आलेले रिक्वेस्ट असल्यामुळे अनेक जण ती स्वीकरत होते. परंतु त्यानंतर वेगळाच प्रकार घडला.

पुढे अशी केली मागणी

पुणे येथील एका सामाजिक कार्यकर्त्याला चार ते पाच दिवसांपूर्वी आमदार तापकीर यांच्याकडून फेसबुकवरुन फ्रेंड रिक्वेस्ट आली. त्यांनी ती स्विकारली. त्यानंतर त्यांना दोन दिवसांनी मेसेंजरवर संपर्क साधला गेला. त्यांचा मोबाईल नंबर मागण्यात आला. पुढे जाऊन जुने फर्निचर विकण्याचे असल्याचे सांगितले. आपल्या ओळखीचे सीआरपीएफमधील अधिकारी सुमित कुमार आहेत. त्यांची बदली झाली आहे. त्यांच्याकडे घरगुती वापराचे जुने फर्निचर उपलब्ध आहे. ते त्यांना विकायचे असल्याचे सांगितले.

असा उघड झाला प्रकार

सुदैवाने त्या सामजिक कार्यकर्त्यास या प्रकरणात शंका आली. त्यांनी थेट भीमराव तापकीर यांना फोन केला. त्यांना हा सगळा प्रकार सांगितला. त्यानंतर आपण फेसबुकवरुन अशी रिक्वेस्ट पाठवली नाही, असे त्यांनी स्पष्ट केल्यानंतर प्रकार उघड झाला. गेल्या काही दिवसांपासून पुणे शहरातील अनेक प्रतिष्ठीत व्यक्तींचे बनावट फेसबुक अकाउंट तयार करून पैशांची मागणी केली जात असल्याचे प्रकार समोर येत आहे.