वैष्णवीला घ्यायचा होता घटस्फोट, पण त्याआधीच…वैष्णवीसोबत नेमकं काय घडलं? मृत्यूचं धक्कादायक सत्य!

Vaishnavi Hagawane Suicide Case : राष्ट्रवादीचे नेते राजेंद्र हगवणे यांच्या सूनेने आत्महत्या केली आहे. या आत्महत्येमुळे संपूर्ण राज्यात खळबळ उडाली आहे. राजेंद्र हगवणे यांच्या सूनेचे नाव वैष्णवी हगवणे असे असून मुळशी येथे हा प्रकार घडला आहे. दरम्यान, आमच्या वैष्णवीने आत्महत्या केली नसून तिचा खून करण्यात आला आहे, असा आरोप तिच्या कुटुंबीयांनी केला आहे. असे असतानाच आता वैष्णवीच्या काही कथिती ऑडिओ क्लिप्स समोर आल्या आहेत. या ऑडिओ क्लिप्समध्ये ती तिच्या सासरी होत असलेल्या जाचाबद्दल बोलताना दिसत आहे. तसेच मला घटस्फोट घ्यायचा आहे, असंही तिनं या ऑडिओ क्लिपमध्ये म्हटलंय.

शवविच्छेदन अहवालात धक्कादायक माहिती

मिळालेल्या माहितीनुसार वैष्णवी हगवणे हिने 16 मे 2025 रोजी आत्महत्या केली होती. पण वैष्णवीने आत्महत्या केली नसून तिची हत्या करण्यात आल्याचा दावा तिच्या कुटुंबीयांनी केला. विशेष म्हणजे वैष्णवीच्या मृतदेहाच्या शवविच्छेदन अहवालातही तिच्या शरीरावर जखमा आणि वृण असल्याचं समोर आलं आहे. या जखमांमुळेही तिचा मृत्यू झालेला असू शकतो, असं या शवविच्छेदनात म्हणण्यात आलंय.

तिला घ्यायचा होता घटस्फोट, पण…

हे आत्महत्या प्ररकरण समोर आल्यानंतर वैष्णवी हगवणेची एक कथित ऑडिओ क्लिप व्हायरल होत आहे. या ऑडिओ क्लिपमध्ये ती तिच्यावर होत असलेल्या अत्याचारावर बोलत आहे. विशेष म्हणजे तिने यात तिचा नवरा शशांक याचंही नाव घेतलंय. सोबतच सासू आणि साररे यांच्या स्वभावाचं मला काही वाटत नाही. कारण सासू सासरे तसेच असतात. पण शशांकही माझा होऊ शकला नाही. माझा नवरा माझा न झाल्याचं मला सर्वांत मोठं दु:ख आहे, असं वैष्णवी हगवणे या कथित ऑडिओ क्लिपमध्ये बोलताना दिसत आहे.

…तर ती वाचली असती

या व्हायरल ऑडिओ क्लिपनुसार वैष्णवी हगवणे ही तिच्या सासराच्या मंडळींच्या जाचाला कंटाळली असल्याचे समोर आले आहे. मी या सर्वाला कंटाळले आहे. मला घटस्फोट घ्यायचा आहे, याबाबत मी माझ्या वडिलांनाही सांगितलं आहे, असंही ती या कथित व्हायरल ऑडिओ क्लिपमध्ये बोलताना दिसत आहे. याच ऑडिओ क्लिपचा आधार घेऊन तिला शशांकपासून विभक्त व्हायचं होतं, पण त्याआधीच ती या जगातून निघून गेली आहे. घटस्फोट झाला असता तर कदाचित ती वाचली असती असंही बोललं जात आहे.