घनकचरा प्रकल्पाच्या सुरक्षा रक्षकांना मारहाण, मारहाणीची घटना सीसीटीव्हीत कैद
कल्याणमधील उंबर्डे घनकचरा प्रकल्पातील सुरक्षारक्षकांना मारहाण केल्याची घटना उघडकीस आली आहे. या मारहाण प्रकरणी 9 जणांवर खडकपाडा पोलीस ठाण्यात गुन्हा दाखल करण्यात आला आहे.
कल्याण / सुनील जाधव : कल्याण पश्चिमेतील उंबर्डे येथे महापालिकेच्या घनकचरा प्रकल्पाच्या सुरक्षा रक्षकांना मारहाण केल्याची घटना उघडकीस आली आहे. सर्व सुरक्षा रक्षक कंत्राटदार पद्धतीने नेमले आहेत. हे सर्व सुरक्षा रक्षक केबीनमध्ये बसले होते. दरम्यान पांढऱ्या रंगाची गाडी जबरदस्तीने आत आली आणि काही जण गाडीतून उतरले आणि एका रक्षकाला मारहाण केली. याच मराहाणीचे सीसीटीव्ही व्हायरल झाले असून, यात कल्याणमधील माजी नगरसेवक दिसत आहेत. दरम्यान, याप्रकरणी खडकपाडा पोलिसांनी 9 अनोळखी व्यक्तींविरोधात गुन्हा दाखल केला आहे.
मारहाण करताना शिवसेनेचे माजी नगरसेवक सीसीटीव्हीत कैद
अशोक निकम, सचिन पाटील, ऋतिक अभिषेक, दिनेश शर्मा अशी मारहाण करण्यात आलेल्या सुरक्षा रक्षकांची नावे आहेत. सुरक्षा रक्षकांना मारहाण करताना शिवसेनेचे माजी नगरसेवक जयवंत भोईर सीसीटीव्हीत कैद झाले आहेत. मात्र भोईर यांनी मारहाणीबाबत स्पष्टीकरण देत सारवासारव करण्याचा प्रयत्न केला आहे. घनकचरा प्रकल्पामुळे दुर्गंधी पसरली होती, याचा जाब विचारण्यासाठी स्थानिक नागरिक गेले होते. त्यावेळी नागरिक आणि ठेकेदाराच्या कर्मचाऱ्यांचा वाद झाला. हा वाद सोडवण्यासाठी मी गेलो होतो, असे भोईर यांनी सांगितले.
मारहाणीत सुरक्षा रक्षक जखमी
या मारहाणीत सचिन पाटील आणि ऋतिक अभिषेक यांना हाताने चापट्या मारल्या, तर दिनेश शर्मा यांना लाकडी दांडक्याने फटका मारुन जखमी केले. त्यानंतर तीन दुचाकींवरुन आलेल्या सहा जणांनी पुन्हा सुरक्षा रक्षकांना मारहाण करण्यास सुरुवात केली. तसेच पुन्हा इथे दिसायचे नाही, असा सज्जड दमही दिला. ही सर्व घटना सीसीटीव्ही कॅमेऱ्यात कैद झाली आहे.
नेमक्या कोणत्या कारणातून सुरक्षा रक्षकांना मारहाण करण्यात आली, याबाबत खडकपाडा पोलीस अधिक तपास करत आहेत. तपासाअंतीच मारहाणीचे खरे कारण उघड होईल.
