…म्हणून संतापलेल्या भावाने तरुणाला भोसकले, धुळ्यातील ‘त्या’ तरुणाच्या हत्याकांडप्रकरणी धक्कादायक खुलासा

धुळे : बहिणीची बदनामी केल्याच्या रागातून धुळ्यात भावाने एका तरुणाची हत्या केल्याची घटना उघडकीस आली आहे. काल तरुणाचा मृतदेह आढळला होता. यानंतर पोलिसांनी अज्ञात मारेकऱ्याचा शोध सुरु केला. सखोल तापासानंतर 12 तासात या हत्याकांडाचा उलगडा करण्यास पोलिसांना यश आले आहे. सतिश मिस्त्री असे हत्या करण्यात आलेल्या तरुणाचे नाव आहे. सतिशच्या हत्येप्रकरणी पोलिसांनी दोन आरोपींना अटक केली आहे. आरोपींपैकी एक अल्पवयीन आहे. चेतन गुजराती असे अटक करण्यात आलेल्या आरोपीचे नाव आहे.

बहिणीची बदनामी केल्याच्या रागातून हत्या

सतिश हा चेतनच्या बहिणीबद्दल उलट सुलट बोलून तिची बदनामी करत असे. याच रागातून चेतनने अल्पवयीन आरोपीच्या मदतीने सतिशची हत्या केल्याचे पोलीस चौकशीत समोर आले आहे. स्थानिक गुन्हे शाखा पथकाने मोहाडी पोलिसांच्या मदतीने अवघ्या 12 तासात मारेकऱ्याचा छडा लावला. या प्रकरणी चेतन गुजरातीसह एका अल्पवयीन मुलाला अटक केली.

अवघ्या 12 तासात हत्येचा उलगडा करत आरोपीला अटक

मोहाडी परिसरातील सतिश मिस्त्री या तरुणाची मुंडके छाटून काल निर्घृणपणे हत्या करण्यात आली होती. अवधान शिवारात शिर नसलेला एका तरुणाचा मृतदेह आढळून आल्याने प्रचंड खळबळ उडाली होती. दरम्यान पोलिसांनी तपासाची चक्रे फिरवत अवघ्या 12 तासात खुनाचा उलगडा लावला असून, आरोपींना अटक केली आहे. पोलीस चौकशीत आरोपींनी गुन्ह्याची कबुली दिली.

बहिणीच्या मागे लग्नाचा तगादा लावणाऱ्या तरुणाची हत्या

तरुणीच्या मागे लग्नाचा तगादा लावणाऱ्या एका तरुणाची मुलीच्या भावाने धारदार शस्त्राने हत्या केल्याची घटना नाशिक शहरातील पंचवटी परिसरात घडली. या प्रकरणी आडगाव पोलिसांनी गुन्हा नोंदवून संशयितास ताब्यात घेतले आहे. विकास रमेश नलावडे असे हत्या करण्यात आलेल्या 27 वर्षीय तरुणाचे नाव आहे. एका तरुणीवर विकास याचे प्रेम होते. त्याला संबंधित तरुणीसोबत लग्न करायचे होते. त्यामुळे विकासने सतत तिच्याकडे लग्नासाठी तगादा लावला होता. ही बाब मुलीच्या भावाला समजल्याने त्याने विकासचा काटा काढला.