यात आठ महिन्याच्या बाळाची काय चूक ? महिलेने घेतलेल्या निर्णयामुळे सगळंच झालं उद्धवस्त

गणेश सोलंकी, TV9 मराठी, बुलढाणा : महिला अत्याचाराविरोधात कितीही कडक कायदे केले तरी महिलांवरील अत्याचार कमी होण्याचे नावच घेताना दिसत नाहीत. विशेषतः हुंडाबळीच्या घटना राज्यात मोठ्या प्रमाणात घडताना दिसताहेत. अशी एक बुलढाणा जिल्ह्यात उघडकीस आली आहे. घरगुती अत्याचाराला (Domestic Violence) कंटाळून एका विवाहितेने आत्महत्या (Women Suicide in Buldhana) करत आपले जीवन संपवले आहे. बुलढाणा जिल्ह्यातील मेहकर (Mehkar Buldhana District) तालुक्यातील देऊळगावमाळी येथे ही घटना घडली आहे.

राधिका पवन खेत्रे असे मयत 22 वर्षीय विवाहितेचे नाव आहे. राधिकाच्या पश्चात आठ महिन्यांची मुलगी आहे. याप्रकरणी पोलिसांनी पतीसह सासरच्या मंडळींविरोधात गुन्हा दाखल करत सर्वांना अटक केली आहे.

सासरचे वारंवार करायचे पैशांची मागणी

राधिका खेत्रे हिचा विवाह पवन खेत्रे याच्याशी झाला होता. दोघांना आठ महिन्यांची मुलगीही आहे. विवाह झाल्यापासूनच पतीसह सासरचे लोक राधिकाचा मानसिक छळ करत होते. तसेच वारंवार माहेरुन पैशांची मागणी करत होते.

राधिकाच्या माहेरच्यांनी दोन-तीन वेळा सासरच्यांशी याबाबत चर्चाही केली. तसेच काही पैसेही त्यांना दिले होते. मात्र तरीही राधिकाच्या सासरच्या लोकांची पैशाची मागणी थांबतच नव्हती.

त्रासाला कंटाळून अखेर टोकाचे पाऊल उचलले

दररोज सासरकडील पती, सासू, सासरा हे लोक तिचा मानसिक छळ करीत असल्याने तो त्रास सहन होत नसल्याने राधिकाने टोकाचे पाऊल उचलले. राहत्या घरातच आत्महत्या करत आपली जीवनयात्रा संपवली.

आईच्या मृत्यूमुळे आठ महिन्यांची मुलगी अनाथ

राधिकाला आठ महिन्यांची मुलगी असून आईच्या मृत्यूमुळे ही मुलगी अनाथ झाली आहे. राधिकाच्या मृत्यूने देऊळगावमाळी गावावर शोककळा पसरली आहे.

याप्रकरणी मयत राधिकांच्या आईने मेहकर पोलिसात तक्रार दाखल केली. या तक्रारीची दखल घेत राधिकाचा पती पवनसह सासू, सासरे, जाऊ आणि दीर यांच्यावर गुन्हे दाखल करून अटक करण्यात आलीय.