CCTV Video : डोंबिवलीत कपड्याच्या डिस्प्लेसाठी लावलेल्या पुतळ्यावरुन वाद, दुकान मालकासह तिघांना बेदम मारहाण, घटना सीसीटीव्हीत कैद

डोंबिवलीत कपड्याच्या डिस्प्लेसाठी लावलेल्या पुतळ्यावरुन वाद

Image Credit source: TV9

डोंबिवली : कपड्यांच्या डिस्प्लेसाठी लावलेला पुतळा हटवण्यावरुन झालेल्या वादा (Dispute)तून एका दुकानदाराने दुसऱ्या दुकानदाराला मारहाण (Beating) केल्याची घटना डोंबिवली पूर्वतील रामनगरमध्ये घडली आहे. याप्रकरणी रामनगर पोलिस ठाण्यात तिघा आरोपींविरोधात गुन्हा दाखल करण्यात आला आहे. मात्र अद्याप पोलिसांनी या तिघांना अटक केली नाही. मारहाणीची संपूर्ण घटना सीसीटीव्ही (CCTV) कॅमेऱ्यात कैद झाली आहे. देवराज पटेल दुबरीया, मयुर पटेल दुबरीया, प्रितेश पटेल दुबरीया अशी गुन्हा दाखल करण्यात आलेल्या आरोपींची नावे आहेत. आरोपींनी बाजूच्या दुकानमालकासह त्याची पत्नी आणि मेहुणीला मारहाण केली आहे.

दुकानमालकाला मारहाण करत साहित्याची तोडफोड केली

डोंबिवली पूर्वेला स्टेशनच्या बाहेर राजेंद्र शेलार यांचे कपड्याचे आणि इतर साहित्याचे दुकान आहे. शेलार यांच्या दुकानाच्याच शेजारी देवराज पटेल दुबरीया याचे देखील कपड्याचे दुकान आहे. देवराज पटेल दुबरीया हा आपल्या दुकानातील कपड्याचा पुतळा शेलार यांच्या दुकानाला खेटून ठेवत असे. अनेक वेळा विनंती करूनही देवराज तो पुतळा हटवत नव्हता. शेलार यांनी काल मंगळवारी पुन्हा देवराजला पुतळा हटवण्यास सांगितले. याच कारणावरून देवराज दुबरिया, त्याचे दोन मुलगे मयुर आणि प्रितेश यांनी शेलार याच्या दुकानात शिरून दुकानातील छत्री व इतर सामान घेऊन शेलार यांच्यासह त्यांची पत्नी सुवर्णा आणि मेहुणी अंजना यांना बेदम मारहाण केली. तसेच दुकानातील साहित्याचेही मोठ्या प्रमाणात नुकसान केले. हा संपूर्ण प्रकार सीसीटीव्हीमध्ये कैद झाला आहे.

जखमी शेलार कुटुंबीयांनी देवराज दुबरिया, मयूर दुबरीया आणि प्रितेश दुबरीया यांच्या विरोधात रामनगर पोलिस ठाण्यात तक्रार दाखल केली आहे. रामनगर पोलिस पुढील तपास करत आहेत. मात्र गुन्हा दाखल होऊन सीसीटीव्ही असूनही पोलीस आरोपींना अटक करत नसल्याने आश्चर्य व्यक्त केले जात आहे. (Three people including shop owner were beaten up due to petty dispute in Dombivli)