Mumbai Fraud : जेष्ठ नागरिकांना मदत करण्याच्या बहाण्याने त्यांचे पैसे लुटायचा, फिल्म इंडस्ट्रीतील स्पॉट बॉयला अटक

मुंबई : जेष्ठ नागरिकांना एटीएममधून पैसे काढण्यासाठी मदत करण्याच्या बहाण्याने त्यांच्या खात्यातून पैसे काढून फसवणूक (Fraud) करणाऱ्या ठगाला बोरिवली पोलिसांनी अटक (Arrest) केले आहे. अशोक घनश्याम वर्मा (27) असे अटक करण्यात आलेल्या आरोपीचे नाव आहे. आरोपी मुंबईतील चेंबूर परिसरात राहत असून फिल्म इंडस्ट्रीत स्पॉट बॉय (Spot Boy)चे काम करतो. आरोपींकडून विविध बँकांचे 37 एटीएम कार्ड जप्त करण्यात आले आहेत. आरोपीने 50 हून अधिक लोकांची फसवणूक केल्याचा पोलिसांना संशय आहे. याबाबत पोलीस आरोपीची कसून चौकशी करत आहेत.

बोरिवली रेल्वे स्थानक परिसरातून आरोपीला अटक

आरोपी अशोक वर्मा हा एटीएममधून पैसे काढणाऱ्या ज्येष्ठ नागरिकांना मदत करण्याच्या बहाण्याने कार्डची देवाणघेवाण करायचा. त्यांच्या खात्यातून पैसे काढायचा. आरोपीने बोरिवली रेल्वे स्थानकावर असलेल्या एटीएम सेंटरमध्ये एका ज्येष्ठ नागरिक महिलेला पैसे काढण्यास मदत करण्याच्या बहाण्याने तिचे एटीएम कार्ड बदलले आणि तिच्या खात्यातून पैसे काढले. महिलेला फसवणुकीचा प्रकार लक्षात येताच तिने बोरिवली जीआरपी पोलिसात तक्रार दाखल केली. तक्रारीनंतर पोलिसांनी आरोपीचा शोध सुरु केला. पोलिस बोरिवली रेल्वे स्थानकातील एटीएमवरही लक्ष ठेवून होते. याच दरम्यान आरोपी पुन्हा एटीएमजवळ आला असता पोलिसांनी त्याला बेड्या ठोकल्या. आरोपी विरोधात बोरिवली व्यतिरिक्त पायधुनी पोलीस ठाण्यातही गुन्हा दाखल आहे.

दादरमधून दुचाकी चोरांना अटक

जालना येथे दुचाकी चोरुन मुंबईत विकणाऱ्या दोन चोरट्यांना समता नगर पोलिसांनी दादरमधील स्वामी नारायण मंदिराजवळून अटक केली आहे. आरोपींकडून चोरीच्या 9 दुचाकीही हस्तगत करण्यात आल्या आहेत. आरोपी जालनातून दुचाकी चोरुन मुंबईत विकायचे. तर मुंबईतील चोरलेल्या दुचाकी जालना आणि औरंगाबाद येथील शेतकऱ्यांना विकायचे. पोलिसांनी विविध ठिकाणांहून चोरलेल्या 9 दुचाकी आरोपींकडून हस्तगत केल्या आहेत. (Accused who robbed senior citizens on the pretext of helping them was arrested)