Nandurbar Crime : शेतीचा वाद टोकाला गेला, दोन गटात तुफान राडा, गोळीबारात दोन ठार
संपत्तीसाठी रक्ताच्या नात्याचाही लोकांना विसर पडतो. मग लोक काय करतील याचा नेम नाही. अशीच एक घटना नंदुरबारमध्ये घडली आहे.
नंदुरबार / 27 जुलै 2023 : शहादा तालुक्यातील मलगाव गावात शेतीच्या वात चव्हाट्यावर आला आणि एकाच कुटुंबातील दोन गटात जुंपली. या वादातून दोन राऊंड फायर करण्यात आले. या गोळीबारात दोघांचा मृत्यू झाला आहे, तर पाच जण जखमी झाले आहेत. घटनेची माहिती मिळताच शहादा पोलीस तात्काळ घटनास्थळी दाखल झाले. घटनेनंतर आरोपी फरार झाले आहेत. पोलिसांनी परिस्थिती नियंत्रणात आणली असून, सद्यस्थितीत गावात पूर्ण शांतता आहे. मात्र या घटनेमुळे अनेक प्रश्न उपस्थित केले जात आहेत. गावठी पिस्तुल आणि तलवारी कुठून आणल्या? याचा तपास पोलीस करत आहेत. अद्याप कुठल्याही आरोपीला अटक झाली नाही. पोलीस फरार आरोपींचा शोध घेत आहेत.
एकाच कुटुंबातील दोन गटात वाद
मध्य प्रदेश राज्याच्या सीमेवरती असलेल्या मलगाव या गावात एका कुटुंबातील दोन गटात शेतीच्या वाद होता. याच शेतीच्या वादातून आज तुफान राडा झाला. या राड्यामध्ये गावठी पिस्तुलाचे 2 राउंड फायर झाले आहेत. यात एक जण जागीच ठार झाला, तर एक जण गंभीर जखमी झाला होता. त्याला तात्काळ उपचारासाठी रुग्णालयात दाखल करण्यात आले होते. मात्र उपचारादरम्यान त्याचा मृत्यू झाला.
अन्य पाच जण जखमी
मात्र घरगुती वादात थेट गावठी पिस्तुल काढून दोन राऊंड फायर केल्याने गावात एकच खळबळ उडाली. तसेच या वादात तलवारीने देखील वार करण्यात आले आहेत. या घटनेत एकूण पाच जण जखमी झाले आहेत. जखमींवर शहादा ग्रामीण रुग्णालयात उपचार सुरू आहेत. मयतांचे मृतदेह शवविच्छेदनासाठी जिल्हा रुग्णालयात पाठवण्यात आले आहेत. फरार आरोपींचा पोलीस शोध घेत आहेत.
