भरधाव रिक्षा अनियंत्रित झाली अन् वडापावच्या गाडीला धडकली, अपघातात गरम तेल अंगावर पडून महिला जखमी

बदलापूर : भरधाव रिक्षाने वडापावच्या गाडीला धडक दिल्याने रिक्षेसह वडापावची गाडीही उलटल्याची घटना बदलापूरमध्ये घडली. यावेळी कढईतलं उकळतं तेल अंगावर पडल्यानं वडापाव विक्रेती महिला भाजली आहे. महिलेला ग्रामीण रुग्णालयात उपाचारासाठी दाखल करण्यात आले आहे. सिमिता कांबळे असे जखमी महिलेचे नाव आहे. याप्रकरणी दोषी रिक्षाचालकाला बदलापूर पोलिसांनी ताब्यात घेतले आहे. याबाबत बदलापूर पोलीस पुढील तपास करत आहेत.

अंबरनाथकडे जाणाऱ्या रस्त्यावर घडला अपघात

बदलापूरहून अंबरनाथकडे येणाऱ्या रस्त्यावर वेंकीज हॉटेलसमोर रविवारी संध्याकाळी हा अपघात घडला. या ठिकाणी सिमिता कांबळे आणि त्यांची आई मंगला पोपटतुपे या रस्त्याच्या बाजूला वडापावची गाडी लावतात.

भरधाव रिक्षाचे नियंत्रण सुटल्याने घडला अपघात

रविवारी संध्याकाळी सातच्या सुमारास अंबरनाथच्या दिशेने भरधाव वेगात जाणारी एक रिक्षा नियंत्रण सुटून थेट या वडापावच्या गाडीला येऊन धडकली. धडक इतकी जोरदार होती, की रिक्षासह वडापावची गाडीसुद्धा उलटली.

वडापावची गाडी उलटल्याने उकळते तेल अंगावर पडले

यावेळी कढईत असलेलं उकळतं तेल वडापाव विक्रेत्या सिमिता कांबळे यांच्या अंगावर पडलं आणि त्या भाजल्या. यानंतर त्यांना जवळच असलेल्या ग्रामीण रुग्णालयात उपचारांसाठी दाखल करण्यात आलंय.

रविवारी बदलापूर शहरातील रस्त्यांवर मोठ्या प्रमाणात वर्दळ असते. त्यातच बदलापूरहून अंबरनाथकडे येणारा रस्ता काहीसा मोकळा असल्यामुळे या भागात सहाजिकच वाहनांचा वेग वाढलेला असतो. मात्र काही वाहनचालक अतिशय बेदरकारपणे वाहन चालवत असल्यामुळे आजवर अनेक अपघात या रस्त्यावर घडले आहेत.

याचाच आणखी एक प्रत्यय रविवारच्या अपघातात आला. यामध्ये वडापाव विक्रेत्या महिलेला मात्र नाहक दुखापतीला सामोरं जावं लागलं. त्यामुळे भविष्यात अशा घटना टाळण्यासाठी बदलापूर पूर्व पोलिसांनी अंबरनाथकडे जाणाऱ्या रस्त्यावर वाहन चालकांच्या वेगावर नियंत्रण आणण्यासाठी प्रयत्न करणं आवश्यक आहे.