Corona Effect : लुडो खेळताना तोंडावर खोकला, मित्राने ठोकला, पाच राऊंड फायर

लखनऊ : लुडो खेळताना एक तरुण समोर उभा असलेल्या मित्राच्या तोंडावर खोकल्याने मित्राने थेट त्याच्यावर गोळीबार (boy firing while playing ludo game) केला. ही घटना उत्तर प्रदेशमधील नोएडा येथे घडली आहे. या घटनेमुळे परिसरात एकच खळबळ उडाली आहे. तरुणाच्या पायाला गोळी लागली असून सध्या त्याच्यावर एका खासगी रुग्णालयात उपचार सुरु आहेत. आरोपी मित्र फरार असून पोलीस त्याचा शोध घेत (boy firing while playing ludo game) आहेत.

गोळी लागलेल्या तरुणाचे नाव प्रशांत आहे. घरची लाईट गेल्यामुळे तो घराबाहेर आपल्या मित्रांसोबत लुडो खेळत होता. लुडो खेळत असताना प्रशांतला खोकला आला. या दरम्यान प्रशांतचा मित्र गुड्डू समोर आल्याने खोकताना थुंकी गुड्डूवर उडाली. त्यामुळे रागात गुड्डूने प्रशांतवर गोळीबार केला.

एक गोळी प्रशांतच्या पायाला लागली. गुड्डूने एकूण पाच राऊंड फायर केले. यामधील बाकी गोळ्या प्रशांतला लागल्या नाहीत.

“प्रशांतच्या पायाला गोळी लागली होती. ती आम्ही काढून टाकली आहे. प्रशांतची प्रकृती गंभीर आहे, मात्र त्यात सुधारणा होईल”, अशी आशा डॉक्टरांनी व्यक्त केली.

नोएडा येथे घडलेल्या घटनेतील आरोपी गुड्डूवर पोलिसांनी जीवे मारण्याचा प्रयत्न केल्या प्रकरणी गुन्हा दाखल केला आहे. पोलिसांनी आरोपीला शोधण्यासाठी एक पथक तयार केले आहे.