ज्या घरात सुशांतने घेतला अखेरचा श्वास, त्याच घरात कोणत्याही फर्नीचरशिवाय का राहतेय प्रसिद्ध अभिनेत्री?

अभिनेता सुशांत सिंह राजपूतने सहा वर्षांपूर्वी याच दिवशी (14 जून) जगाचा अखेरचा निरोप घेतला होता. त्याच्या निधनाने संपूर्ण इंडस्ट्रीला मोठा धक्का बसला होता. मुंबईतील वांद्रे परिसरातील राहत्या निवासस्थानी सुशांत मृतावस्थेत आढळला होता. नंतर त्याचं हे घर काही काळ बंदच ठेवण्यात आलं होतं. कारण त्या घरात राहण्याचं धाडस कोणीच करत नव्हतं. अखेर काही वर्षांनंतर ‘द केरळ स्टोरी’ फेम अभिनेत्री अदा शर्माने सुशांतचं घर भाडेतत्त्वावर घेतलं. आता नुकत्यात दिलेल्या एका मुलाखतीत अदा शर्मा सुशांतच्या घरात राहण्याच्या निर्णयाबद्दल मोकळेपणे व्यक्त झाली.

14 जून 2020 रोजी सुशांत सिंह राजपूतच्या निधनानंतर त्याचं घर बराच काळ रिकामं राहिलं होतं. नंतर जेव्हा अदा तिथे राहायला गेली, तेव्हा तिला सुरुवातीला मोठ्या टीकेला सामोरं जावं लागलं होतं. आता सुशांतच्या पुण्यतिथीनिमित्त अदा शर्माने घरावरून झालेला वाद, लोकांच्या प्रतिक्रिया आणि घरातील एकंदर वातावरणाबद्दल व्यक्त झाली.

‘झूम’ वाहिनीला दिलेल्या मुलाखतीत सुशांतच्या घरात राहायला गेल्यानंतर लोकांच्या नकारात्मक प्रतिक्रियांना तिने कसं हाताळलं, असा प्रश्न विचारण्यात आला. त्यावर अदा म्हणाली, “तीन वर्षांपासून ओसाड आणि बंद असलेलं घर अखेर पुन्हा वापरात येत असल्याचा लोकांना खरंतर आनंद झाला होता. माझ्यावरील बहुतेक आरोप हे केवळ बातमीला सनसनाटी बनवण्याचा प्रयत्न होता. खरंतर लोक आनंदी होते. फक्त क्लिक्स मिळवण्यासाठी तशा बातम्या प्रसिद्ध करण्यात आल्या होत्या. मला प्रत्यक्षात कोणत्याही समस्यांना सामोरं जावं लागलं नाही.”

View this post on Instagram

A post shared by Adah Sharma (@adah_ki_adah)

सुशांतच्या जुन्या वस्तू किंवा फर्निचर अजूनही फ्लॅटमध्ये आहेत का, असा प्रश्न तिला पुढे विचारण्यात आला. त्यावर तिने स्पष्ट केलं की, फ्लॅटमध्ये सुशांतच्या कोणत्याही वस्तू नाहीत. संपूर्ण घर रिकामं ठेवण्यात आलं होतं. “त्या फ्लॅटचे घरमालक लालवानी आहेत. जेव्हा मी तिथे राहायला गेले, तेव्हा त्यात एकही फर्नीचर नव्हतं. घरमालकाने मला फर्नीचरबद्दल विचारलं होतं, पण मी नकार दिला. कारण मला खचाखच भरलेल्या खोल्यांपेक्षा मोकळ्या, रिकाम्या जागा अधिक आवडतात. त्यामुळे मी फ्लॅटमध्ये कोणतंच फर्नीचर ठेवलं नाही. मी माझ्या या घरात खूप आनंदी आहे आणि इथे खूप सकारात्मक ऊर्जाही जाणवते. माझा असा विश्वास आहे की आपण जिथे कुठे राहतो, तिथे नेहमी वर्तमानात जगावं आणि फक्त सुंदर, आनंदी आठवणी निर्माण करण्याचा प्रयत्न करावा”, असं अदा पुढे म्हणाली.

अदा शर्मा गेल्या 18 वर्षांपासून बॉलिवूड इंडस्ट्रीत काम करतेय. नुकतीच ती चिन्मय मांडलेकर दिग्दर्शित ‘द गव्हर्नर’ या चित्रपटातून प्रेक्षकांच्या भेटीला आली होती.