Aishwarya Rai: अमिताभ बच्चन यांच्यासाठी सून ऐश्वर्या रायची खास पोस्ट; नेटकरी म्हणाले ‘ती खूप प्रयत्न करते पण..’

बॉलिवूडचे महानायक अमिताभ बच्चन यांनी 11 ऑक्टोबर रोजी त्यांचा 84 वा वाढदिवस साजरा केला. या खास प्रसंगी देशभरातील चाहते आणि चित्रपटसृष्टीतील अनेक कलाकारांनी त्यांच्यावर शुभेच्छांचा वर्षाव केला. मात्र, या सगळ्यात त्यांची सून आणि अभिनेत्री ऐश्वर्या राय बच्चन हिच्या सोशल मीडिया पोस्टने सर्वांचं लक्ष वेधून घेतलं. ऐश्वर्याने वाढदिवशी उशिरा रात्री अमिताभ बच्चन आणि त्यांची नात आराध्या यांचा एक खास फोटो शेअर करत त्यांना शुभेच्छा दिल्या. या पोस्टनंतर काही चाहत्यांनी तिच्या प्रेमळ संदेशाचं कौतुक केलं, तर काहींनी पोस्ट करण्याच्या वेळेवरून प्रश्न उपस्थित केले.

ऐश्वर्या राय बच्चनने तिच्या अधिकृत इन्स्टाग्राम अकाउंटवर अमिताभ बच्चन आणि आराध्या यांचा एक सुंदर फोटो शेअर केला. या फोटोमध्ये अमिताभ आपल्या लाडक्या नातीला प्रेमाने मिठी मारताना दिसत आहेत. फोटोसोबत ऐश्वर्याने लिहिलं, ‘प्रिय पा-दादाजी यांना वाढदिवसाच्या शुभेच्छा. तुमच्यावर नेहमी प्रेम आणि देवाचा आशीर्वाद राहो.’

ऐश्वर्या राय बच्चन सोशल मीडियावर फारशी सक्रिय नसते. ती सहसा तिच्या कामाशी संबंधित पोस्ट किंवा कुटुंबातील खास प्रसंगी फोटो शेअर करताना दिसते. अमिताभ बच्चन यांच्या वाढदिवसानिमित्तही तिने आराध्यासोबतचा फोटो शेअर करण्याची परंपरा कायम ठेवली. मात्र, यावेळी तिच्या पोस्टवर नेटकऱ्यांच्या वेगवेगळ्या प्रतिक्रिया पाहायला मिळाल्या. काहींनी तिच्या पोस्टचं कौतुक करत अमिताभ आणि आराध्या यांच्या नात्याला सुंदर म्हटलं. तर काहींनी वाढदिवसाच्या दिवशी उशिरा पोस्ट केल्याबद्दल प्रश्न उपस्थित केले. काही सोशल मीडिया वापरकर्त्यांनी बच्चन कुटुंबातील नातेसंबंधांबाबतही तर्कवितर्क मांडले.

पहा फोटो-

View this post on Instagram

A post shared by AishwaryaRaiBachchan (@aishwaryaraibachchan_arb)

ऐश्वर्या नेहमीच तिच्या सासऱ्यांविषयी प्रेमळ असते, पण अमिताभ बच्चन कधीच तिच्याविषयी काही पोस्ट करत नाही, असं एकाने लिहिलं. तर ऐश्वर्या तिच्या सासूच्या वाढदिवशी कधीच पोस्ट करत नाही, असं दुसऱ्या युजरने म्हटलंय. ‘सर्वकाही चांगलं आहे, असं दाखवण्यासाठी ऐश्वर्या खूप धडपड करते. पण बच्चन कुटुंबीयांना कधीच तिच्यासाठी काही विशेष प्रयत्न केल्याचं पाहिलं नाही’, असाही टोला नेटकऱ्यांनी लगावला आहे.

दरम्यान, अमिताभ यांच्या वाढदिवसानिमित्त अनेक कलाकारांनी त्यांना शुभेच्छा दिल्या. शत्रुघ्न सिन्हा, चिरंजीवी, कमल हासन, अजय देवगण, काजोल आणि माधुरी दीक्षित यांच्यासह अनेक कलाकारांनी महानायकावर प्रेमाचा वर्षाव केला. अमिताभ बच्चन यांच्या वाढदिवशी मुंबईतील त्यांच्या ‘जलसा’ या निवासस्थानाबाहेर चाहत्यांची मोठी गर्दी जमली होती. आपल्या लाडक्या अभिनेत्याची एक झलक पाहण्यासाठी चाहते उत्सुक होते. अमिताभ यांनीही घराबाहेर येऊन चाहत्यांचं अभिवादन स्वीकारलं आणि त्यांचे आभार मानले.