‘मी राकेश कुमार यांच्या अंत्यविधीला जाणार नाही’; बिग बी असं का म्हणाले?

मुंबई- बॉलिवूडचे महानायक अमिताभ बच्चन यांनी त्यांचे जवळचे मित्र आणि दिग्दर्शक राकेश कुमार यांच्या निधनावर दु:ख व्यक्त केलं आहे. बिग बींनी त्यांच्या ब्लॉगद्वारे राकेश कुमार यांच्यासाठी भावना व्यक्त केल्या आहेत. राकेश कुमार यांच्या अंत्यविधीला न जाण्यामागचं कारणसुद्धा त्यांनी या ब्लॉगमध्ये सांगितलं आहे.

‘आणखी एक दु:खाचा दिवस. आणखी एक सहकारी आपल्याला, खासकरून मला सोडून गेला. राकेश यांनी ‘जंजीर’साठी सहाय्यक दिग्दर्शक म्हणून, प्रकाश मेहरा यांच्या इतर चित्रपटांसाठी दिग्दर्शक म्हणून काम केलं. हेरा फेरी, खून पसीना, मिस्टर नटवरलाल, याराना यांसारखे चित्रपट त्यांनी इंडस्ट्रीला दिले. सेटवर आणि इतर कार्यक्रमांमध्ये, होळीच्या जल्लोषात ते आनंदाने सहभागी व्हायचे’, अशा शब्दांत बिग बींनी आठवणी सांगितल्या.

‘एकानंतर एक सर्वजण सोडून गेले. मात्र राकेश कुमार यांच्यासारखे लोक आपली छाप सोडून जातात, त्याला मिटवणं कठीण असतं. स्क्रीनप्ले आणि दिग्दर्शनाचं त्यांचं ज्ञान अफाट होतं. त्यांच्या त्यांच्या प्रतिभेवर पूर्ण विश्वास होता. आपल्या सहकलाकारांच्या कोणत्याही दु:खात ते खंबीरपणे साथ द्यायचे. त्यांची मदत करण्यासाठी तत्पर असायचे’, असं त्यांनी पुढे लिहिलं.

राकेश कुमार यांच्या अंत्यविधीला न जाण्यामागचं कारण सांगताना त्यांनी लिहिलं, ‘मी त्यांच्या अंत्यविधीला जाणार नाही. कारण राकेश यांना मी अशा परिस्थितीत बघू शकत नाही. राकेश यांनी त्यांच्या कल्पनांनी आणि चित्रपटांनी आमच्यासारख्यांना मोठं केलं. त्यांची खूप आठवण येईल.’

राकेश कुमार यांचं 10 नोव्हेंबर रोजी मुंबईत निधन झालं. ते 81 वर्षांचे होते. गेल्या काही काळापासून ते कर्करोगाने ग्रस्त होते.