‘स्वत:ला काश्मिरी हिंदू म्हणता अन्..’; श्रावणातील ‘त्या’ कृत्यामुळे अनुपम खेर यांच्यावर भडकले नेटकरी
अनुपम खेर हे लवकरच अनुराग बासू दिग्दर्शित 'मेट्रो इन डिनो' या चित्रपटातून प्रेक्षकांच्या भेटीला येणार आहेत. यामध्ये आदित्य रॉय कपूर, सारा अली खान, कोंकना सेन शर्मा, पंकज त्रिपाठी, फातिमा सना शेखर, अली फजल आणि नीना गुप्ता यांच्या भूमिका आहेत.
मुंबई : ज्येष्ठ अभिनेते अनुपम खेर हे त्यांच्या दमदार अभिनयासोबतच बेधडकपणे मतं मांडण्यासाठी ओळखले जातात. सोशल मीडियावर ते बऱ्यापैकी सक्रिय असतात आणि विविध फोटो, व्हिडीओंच्या माध्यमातून ते सतत चाहत्यांच्या संपर्कात असतात. नुकताच त्यांनी इन्स्टाग्रामवर स्वत:चा एक व्हिडीओ पोस्ट केला आहे. या पोस्टमध्ये ते किचनमध्ये काहीतरी बनवताना दिसत आहेत. मात्र या व्हिडीओमुळे काहींच्या भावना दुखावल्या गेल्या आहेत. म्हणूनच नेटकऱ्यांनी अनुपम खेर यांना ट्रोल करण्यास सुरुवात केली. काहींनी तर त्यांच्या हिंदू असण्यावर प्रश्न उपस्थित केला.
अनुपम खेर यांनी पोस्ट केलेल्या व्हिडीओत ते अंड्याची भुर्जी बनवताना दिसत आहेत. “आज अंड्याची भुर्जी स्वत:च्या हातांनी बनवून खाण्याची इच्छा झाली आहे”, असं ते या व्हिडीओत सांगतात. या व्हिडीओच्या कमेंट्समध्ये अनेकांनी अनुपम यांना ट्रोल केलं आहे. श्रावण महिन्यात अंड खाल्ल्याने त्यांना खरंखोटं सुनावत आहेत. ‘खोटे पंडितजी, श्रावण महिना सुरू आहे’, असं एकाने लिहिलं. तर ‘श्रावणात अंड? उफ्फ विराट हिंदू?’ असा उपरोधिक टोला दुसऱ्या युजरने लगावला. ‘श्रावणात अंडी खाऊन म्हणता की मी हिंदू आहे आणि ते सुद्धा काश्मिरी’, असं नेटकऱ्यांनी म्हटलंय.
पहा व्हिडीओ
View this post on Instagram
अनुपम खेर हे लवकरच अनुराग बासू दिग्दर्शित ‘मेट्रो इन डिनो’ या चित्रपटातून प्रेक्षकांच्या भेटीला येणार आहेत. यामध्ये आदित्य रॉय कपूर, सारा अली खान, कोंकना सेन शर्मा, पंकज त्रिपाठी, फातिमा सना शेखर, अली फजल आणि नीना गुप्ता यांच्या भूमिका आहेत. याशिवाय ते विवेक अग्निहोत्री दिग्दर्शित ‘द वॅक्सिन वॉर’ या चित्रपटातही महत्त्वपूर्ण भूमिका साकारणार आहेत. अभिनेत्री कंगना रनौतच्या ‘इमर्जन्सी’ या चित्रपटात ते जयप्रकाश नारायण यांच्या भूमिकेत दिसणार आहेत.
याशिवाय ते आणखी एका चित्रपटात रवींद्रनाथ टागोर यांच्या भूमिकेत झळकणार आहेत. ‘मी माझ्या 538 व्या प्रोजेक्टमध्ये गुरुदेव रवींद्रनाथ टागोर यांची भूमिका साकारत असल्याने मला खूप जास्त आनंद होत आहे. खरोखर मला पडद्यावर गुरुदेव रवींद्रनाथ टागोर यांची भूमिका साकारण्यास मिळाल्याने मी स्वत:ला खूप जास्त भाग्यवान समजतो,’ अशी पोस्ट त्यांनी लिहिली होती.
