लता मंगेशकर यांच्यामुळे संपलं करिअर? चर्चांवर अखेर अनुराधा पौडवाल यांनी सोडलं मौन

बॉलिवूडच्या सर्वोत्तम गायिकांपैकी एक अनुराधा पौडवाल यांची एकेकाळी स्वरसम्राज्ञी लता मंगेशकर यांच्याशी तुलना केली जायची. याच तुलनेतून एक वाद जन्माला आला होता की लता मंगेशकर यांनी अनुराधा यांना कधीच पुढे जाऊ दिलं नाही. या चर्चांवर आता खुद्द अनुराधा यांनी प्रतिक्रिया दिली आहे. 70-80 च्या दशकात आणि त्यानंतरही बॉलिवूडमध्ये लता मंगेशकर यांचा बोलबाला होता. कोट्यवधी लोक त्यांच्या आवाजाचे चाहते होते आणि आजही आहेत. याचदरम्यान अनुराधा पौडवाल यांनी इंडस्ट्रीत करिअरची सुरुवात केली होती आणि हळूहळू त्यांचीही गाणी देशातील कानाकोपऱ्यात ऐकायला मिळत होते. मात्र जेव्हा अनुराधा यांच्या करिअरला उतरती कळा लागली, तेव्हा काही लोकांनी अशी टीका करण्यास सुरुवात केली की, लता मंगेशकर यांनी त्यांना पुढे जाऊ दिलं नाही.

काय म्हणाल्या अनुराधा पौडवाल?

आता अनेक वर्षांनंतर अनुराधा पौडवाल यांनी या चर्चांवर प्रतिक्रिया दिली आहे. एका पॉडकास्ट मुलाखतीत त्या म्हणाल्या, “गुरूंची बरोबरी कोणीच करत नाही, असं मी मानते. गुरूंना फॉलो केलं जातं, त्यांची पूजा केली जाते. मला त्यांच्याकडून जितकं शिकता आलं, तितकं मी शिकले. दुसरी गोष्ट म्हणजे, लोकांचे विचारच असे आहेत, कारण ते आमची तुलना करतात. त्यामुळे त्यांनी मला पुढे जाऊ दिलं नाही, हे ऐकायला त्यांना फार मसालेदार वाटतं. लतादीदींची कला ज्या शिखरावर होती, त्या शिखराजवळ तरी पोहोचलं पाहिजे ना, तेव्हाच तुलना होईल.” यावेळी त्यांना लता मंगेशकर आणि आशा भोसले यांच्यापैकी कोण आवडत्या गायिका आहेत, असं विचारलं असता त्यांनी लतादीदींचं नाव घेतलं.

अनुराध पौडवाल या 1973 पासून संगीतक्षेत्रात कार्यरत आहेत. त्यांनी बॉलिवूड चित्रपटांमधील अनेक सुपरहिट गाणी गायली आहेत. मात्र भक्तीगीतांमधून त्यांना सर्वाधिक यश मिळालं. त्यांनी विविध भाषांमध्ये नऊ हजारांहून अधिक गाणी रेकॉर्ड केली आहेत. भक्ती संगीत आणि बॉलिवूड इंडस्ट्रीतील अमूल्य योगदानामुळे त्यांना ‘पद्मश्री’ पुरस्काराने सन्मानित करण्यात आलं आहे. चाहत्यांनी त्यांना ‘भजन क्वीन’, ‘मेलडी क्वीन’ आणि ‘भक्तीचा अमर आवाज’ अशी विशेषणंही दिली आहेत.