Bigg Boss 16: प्रियांका धर्मसंकटात; 25 लाख रुपये की अंकित गुप्ता, कोणाला निवडणार अभिनेत्री?
प्रेमाची निवड करणार की पैशांची? प्रियांकासमोर बिग बॉसने ठेवली मोठी अट
मुंबई: बिग बॉसच्या घरात नेहमीच स्पर्धकांमधील मैत्री आणि नात्याची परीक्षा घेतली जाते. गेल्या काही आठवड्यात बिग बॉसने अनेक स्पर्धकांची अशीच परीक्षा घेतली. या परीक्षेत शालीन भनोट आणि टीना दत्ता यांची मैत्री अपयशी ठरली. तर शिव ठाकरे त्याच्या मित्रांसोबत ठामपणे उभा राहिला. आता अभिनेत्री प्रियांका चहर चौधरीसमोर बिग बॉसने अशीच एक अट घातली आहे. या एपिसोडचा प्रोमो नुकताच सोशल मीडियावर पोस्ट करण्यात आला आहे. ज्यामध्ये प्रियांका धर्मसंकटात सापडल्याचं पहायला मिळतंय.
सोशल मीडियावर शेअर केलेल्या या प्रोमोमध्ये पहायला मिळतंय की प्रियांकाला बिग बॉसने कन्फेशन रुममध्ये बोलावलं. बिग बॉस प्रियांकाला 25 लाख रुपयांची गमावलेली बक्षिसाची रक्कम परत मिळवण्याची संधी देतो. मात्र त्या रकमेच्या बदल्यात बिग बॉसने प्रियांकासमोर ठेवलेली अटसुद्धा तितकीच मोठी आहे.
सध्या बिग बॉसच्या घरात प्रियांकाची साथ देणारी एकच व्यक्ती आहे, हे प्रत्येकाला माहीत आहे. तिच्या मैत्रिणी अर्चना आणि सौंदर्यासुद्धा तिला सोडून गेल्या आहेत. त्यानंतर सर्वजण प्रियांका आणि अंकित गुप्ताला टारगेट करत आहेत.
“तू 25 लाख रुपयांची गमावलेली बक्षिसाची रक्कम परत मिळवू शकते, पण त्याच्या बदल्यात अंकित गुप्ताला आताच घराबाहेर जावं लागेल”, असं बिग बॉस म्हणतो. हे ऐकून प्रियांकाला मोठा धक्का बसतो. दुसरीकडे बिग बॉस काऊंटडाऊन सुरू करतो. त्यामुळे आता ती कोणता निर्णय घेणार याकडे सर्वांचं लक्ष लागून राहिलं आहे.
प्रियांकाने बक्षिसाची रक्कम नाकारत अंकितला निवडलं तर घरात कोणता वाद निर्माण होईल, हे सांगता येत नाही. याआधीही काही सदस्यांनी 25 लाख रुपये गमावले आहेत. त्यामुळे प्रियांकाने अंकितची निवड केल्यास, त्यात काहीच वाईट नाही. सुंबुल तौकिरनेही दोन वेळा 25 लाख रुपये गमावले आहेत. मात्र प्रियांकाने अंकितची निवड केली तर तिला बिग बॉसच्या घरातील इतर स्पर्धकांच्या टीकेचा सामना करावा लागणार, हे मात्र नक्की.
