Ajay Devgn: अजय देवगणच्या जुहूतील बंगल्यावर महापालिकेची नोटीस; नेमकं काय घडलं?
Ajay Devgn: आता अजय देवगणच्या कुटुंबाकडून चार आठवड्यांच्या मुदतीत कोणती कागदपत्रे सादर केली जातात आणि त्यानंतर महापालिकेकडून काय निर्णय घेतला जातो, हे पाहणं महत्त्वाचं ठरणार आहे.
Ajay Devgn: अभिनेता अजय देवगणच्या मुंबईतील जुहू परिसरातील बंगल्याबाबत एक महत्त्वाची बातमी समोर आली आहे. त्याच्या बंगल्यात प्रस्तावित असलेल्या सलून आणि स्पाच्या कामावर मुंबई महापालिकेनं ‘स्टॉप वर्क’ (काम थांबवा) नोटीस बजावली आहे. संबंधित जागेच्या व्यावसायिक वापरासाठी आवश्यक परवानगी नसल्याचं महापालिकेच्या अधिकाऱ्यांनी स्पष्ट केल्याची माहिती समोर आली आहे. या कारवाईमुळे अजय देवगणच्या बंगल्याची चर्चा पुन्हा एकदा रंगली आहे. मिळालेल्या माहितीनुसार, अजय देवगणचा बंगला जुहू इथल्या कापोले को-ऑपरेटिव्ह हाऊसिंग सोसायटीमध्ये आहे. या बंगल्यात सलून आणि स्पासाठी काही काम सुरू असल्याची माहिती मिळाल्यानंतर सोसायटीकडून तक्रार करण्यात आली. त्यानंतर महापालिका अधिकाऱ्यांनी या प्रकरणाची पाहणी करत संबंधित मालमत्ताधारकांकडून आवश्यक कागदपत्रे आणि परवानग्या मागवल्या.
व्यावसायिक वापरासाठी आवश्यक असलेली कागदपत्रे किंवा परवानग्या सादर करण्यात आल्या नसल्याचं अधिकाऱ्यांच्या निदर्शनास आलं. त्यामुळे महापालिकेच्या के- पश्चिम विभागाने संबंधित बांधकाम किंवा काम तातडीने थांबवण्याचे निर्देश देणारी नोटीस बजावली आहे. या संपूर्ण प्रकरणाच्या केंद्रस्थानी जागेच्या वापराचा मुद्दा आहे. संबंधित बंगल्याच्या जागेचा सलून आणि स्पासाठी व्यावसायिक वापर करण्यास महापालिकेची परवानगी नसल्याचं अधिकाऱ्यांनी सांगितलं आहे. त्यामुळे आवश्यक मंजुरी मिळेपर्यंत प्रस्तावित काम पुढे सुरू ठेवता येणार नाही.
महापालिकेच्या नियमांनुसार एखाद्या निवासी मालमत्तेचा व्यावसायिक कारणांसाठी वापर करायचा असल्यास त्यासाठी संबंधित परवानग्या आणि मंजुरी आवश्यक असतात. त्यामुळे या प्रकरणात कागदपत्रे सादर करण्यास सांगण्यात आल्यानंतरही ती उपलब्ध न झाल्याने महापालिकेने पुढील कारवाई केली. अजय देवगणच्या कुटुंबाने या प्रकरणी आपली बाजू मांडण्यासाठी चार आठवड्यांचा वेळ मागितल्याची माहिती समोर आली आहे. त्यामुळे आता संबंधित कागदपत्रे आणि परवानग्या महापालिकेसमोर सादर केल्या जातात का, याकडे लक्ष लागलं आहे.
जुहू हा मुंबईतील बॉलिवूड सेलिब्रिटींच्या आलिशान घरांसाठी प्रसिद्ध परिसर आहे. कापोले को-ऑपरेटिव्ह हाऊसिंग सोसायटीमध्येही अनेक प्रसिद्ध व्यक्तींची घरं आहेत. त्यामुळे अजय देवगण यांच्या बंगल्याशी संबंधित महापालिकेच्या कारवाईची बातमी समोर आल्यानंतर या प्रकरणाकडे विशेष लक्ष वेधलं गेलं आहे.
