सलमान खानच्या घरावर कुख्यात गुंडाची करडी नजर… कुटुंबातील सदस्याला धमकी आणि…

अभिनेता सलमान खान याला लॉरेन्स बिष्णोई गँगने अनेकदा जीवे मारण्याची धमकी दिली आहे. एवढंच नाही तर, सलमान खान याच्या घराबाहेर गोळीबार देखील करण्यात आला. आता सलमान खान याच्या बहिणीच्या पतीला लॉरेन्स बिष्णोई गँगने धमकी दिली आहे. अर्पिता शर्मा हिचा पती आणि अभिनेता आयुष शर्मा याला ईमेल करत धमकी देण्यात आली आहे. आयुष याला ईमेल पाठवणाऱ्याने लॉरेन्स बिश्नोई टोळीचा सदस्य असल्याचा दावा पोलिसांनी सांगितले, परंतु अधिक माहिती दिली नाही. अभिनेता रणवीर सिंगला व्हॉट्सअॅपवरून धमकी मिळाल्याच्या एका दिवसानंतर आयुष शर्मा याला देखील धमकी देण्यात आली आहे.

एका अधिकाऱ्याने दिलेल्या माहितीनुसार, सध्या कोणतीही औपचारिक तक्रार दाखल करण्यात आली नसली तरी, अभिनेता आयुष शर्माला मिळालेल्या धमकीच्या ईमेलची चौकशी मुंबई पोलिसांनी सुरू केली आहे. मुंबई गुन्हे शाखेने सांगितलं की, आयुषला बुधवारी म्हणजे 11 फेब्रुवारी रोजी ही धमकी मिळाली आहे.

अधिकाऱ्याने सांगितल्यानुसार, गुन्हे शाखा हा ईमेल खरा आहे की कोणीतरी केलेला विनोद आहे याची पडताळणी करण्याचा प्रयत्न करत आहे. ही घटना अशा वेळी घडली आहे जेव्हा अभिनेता रणवीर सिंग याला देखील अज्ञात व्यक्तींकडून व्हॉट्सअॅपवर धमक्या मिळाल्या आहेत. धमकी मिळाल्यानंतर रणवीर आणि कुटुंबियांच्या सुरक्षेत देखील वाढ करण्यात आली आहे.

मंगळवारी एका अधिकाऱ्याने दिलेल्या माहितीनुसार, पोलिसांना संशय आहे की, धुरंधर फेम अभिनेता रणवीर याला धमकी लॉरेन्स बिष्णोई गँगच्या एका व्यक्तीने दिली असेल. गेल्या आठवड्यात, दिग्दर्शक रोहित शेट्टी यांच्या घरावर देखील गोळीबार करण्यात आला. या गोळीबाराची जबाबदारी देखील लॉरेन्स बिष्णोई गँगने स्वीकारली. सोशल मीडियावर एक पोस्ट करत लॉरेन्स बिष्णोई गँगने गोळीबाराची जबाबदारी होती.

रोहित शेट्टीच्या इमारतीबाहेर गोळीबार झाल्याच्या घटनेनंतर अभिनेता रणवीर सिंहलाही धमकीचा मेसेज मिळाला होता. ही धमकी त्याला व्हॉट्सअॅप व्हॉइस नोटद्वारे देण्यात आली होती. रणवीरकडे कोट्यवधी रुपयांची मागणी करण्यात आली होती. सतत धमक्या येत असल्यामुळे बॉलिवूडमध्ये दहशतीचं वातारवरण आहे.